Ахсынньы 16 күнүгэр Дьокуускай куоракка күн иккис аҥарыгар тыа хаһаайыстыбатын министиэристибэтин дьиэтигэр Арктика судаарыстыбаннай агротехнологическай университетын ипподромугар саха автономиятын төрүттэспит, сир оҥоһуутун наркомунан үлэлээбит С.М.Аржаков аатын иҥэрэр туһунан сөбүлэһиигэ улуус баһылыга Сергей Винокуров уонна АГАТУ ректора Валерий Федоров илии баттастылар.
Степан Максимович Аржаков 5 сыл сир оҥоһуутугар бастакы наркомунан үлэлии олорон Саха АССР тыатын хаһаайыстыбатын салаатын сайдыытыгар сүҥкэн кылаатын киллэрбитэ: колхуостары тэрийии, тиэхиньикэнэн хааччыйыы, тыа заһаайыстыбатын бородууксуйатын оҥорон таһаарыытын үрдэтии боппуруостарын быһаарбыта.
Кини аата Саха сиригэр тыа хаһаайыстыбатын салаатын сайдыытын кытта быһаччы ситимнээх.
Саха сиригэр аан бастаан ат сүүрдүүтэ уонна атыы-эргиэн дьаарбаҥката 1935 сыллаахха ипподромҥа ыытыллыбыта. Историяҕа киирбит тэрээһиннэр С. М. Аржаков салалтатынан тэриллибиттэрэ.
Билигин кини бүүһэ тыа хаһаайыстыбатын уонна ас-үөл бэлиитикэтин министиэристибэтин дьиэтин иннигэр кини оҥорбут үтүөтүн кэрэһэлээн турар.
Өрөспүүбүлүкэтээҕи ипподромҥа С.М.Аржаков аата иҥэриллибитэ сүгүрүйүү бэлиэтинэн буолар.
Николай Куприянов.