Быйыл Бүлүү улууһун тыатын хаһаайыстыбатын салаатыгар ыытыллыбыт элбэх тэрээһин Степан Аржаков төрөөбүтэ 125 сылыгар ананна.
Ааһан эрэр 2024 сыл Бүлүү улууһугар судаарыстыбаннай, бэлитиичэскэй диэйэтэл, сэбиэскэй былааһы олохтоспут, саха автономиятын төрүттэспит, Саха Өрөспүүбүлүкэтин норуотун хаһаайыстыбата сайдарыгар бөдөҥ кылаатын киллэрбит, саҥа саҕахтары арыйбыт Степан Максимович Аржаков сылынан биллэриллибитэ.
Кини Саха АССР сир үлэтигэр норуодунай хамыһаарынан 1932 сыл тохсунньу ыйыттан 1937 сыл атырдьах ыйыгар диэри ситиһиилээхтик үлэлээбитэ: колхуостааһыны тэрийбитэ, тыа хаһаайыстыбатын салаатыгар мэхэньисээсийэ киирэригэр киэҥ аартыгы арыйбыта, тыраахтар көмөтүнэн бурдугу ыһыыны далааһыннаахтык ыытары тэрийбитэ уо.д.а. саҥа сүүрээннэри киллэрбитэ.
Быйыл Степан Аржаков төрөөбүтэ 125 сылыгар аналлаах улууска тыа хаһаайыстыбатын салаатыгар туох тэрээһиннэр ыытылыннылар? Тыа хаһаайыстыбатын департаменын салайааччы Павел Иннокентьев туох-ханнык үлэ ыытыллыбытын билиһиннэрэр:
— Билиҥҥи өйдөбүлгэ сыһыаран эттэххэ, Степан Максимович Аржаков 1932-37 сыллардаахха Саха АССР тыатын хаһаайыстыбатын миниистиринэн үлэлээбитэ. Ити үрдүк дуоһунаска үлэлии олорон, кини тыа хаһаайыстыбатын салаатыгар элбэх саҥаны киллэрбитэ биллэр. Биһиги, бүлүүлэр, кини оҥорбут дьыалаларынан, үлэтинэн, олоҕунан киэн туттабыт. Улууска, өрөспүүбүлүкэҕэ быйылгы сылга элбэх тэрээһин Степан Аржаков сылыгар ананан ыытылыннылар.
Тыа хаһаайыстыбатын салаатыгар элбэх тэрээһин Степан Аржаковка ананан ыытылынна. От ыйын 11-12 күннэригэр Тыымпы кэпэрэтиип «Сырдык Уулаах» сайылыгар “Идэтигэр бастыҥ” зоотехник-селекционердар өрөспүүбүлүкэтээҕи үһүс куонкурустара ыытыллыбыта. Барыта 13 улуустан 22 зоотехник түөрт көрүҥҥэ куоталаспыттара. Степан Максимович Аржаков төрөөбүтэ 125 сылыгар анаммыт тэрээһини тыа хаһаайыстыбатын министиэристибэтэ, “Сахаагроплем” тэрилтэ тэрийбиттэрэ. Бүлүү улууһун дьаһалтата, тыа хаһаайыстыбатын департамена, I Тоҕус нэһилиэгин дьаһалтата, “Тыымпы” ПК өрөспүүбүлүкэтээҕи куонкурсу ыытыыны тэрийсибиттэрэ.
Бүлүүлэртэн «Сылгыны үөрдээн иитии зоотехниктара» көрүҥҥэ бастакы миэстэни Анатолий Самсонов, «Табаарынай ынах сүөһүнү иитии зоотехниктара» көрүҥҥэ «Ампаардаах» ХЭТ Александра Лаврентьева иккис миэстэлэри ылбыттара. Кыайыылаахтарга, миэстэлэспиттэргэ ботуччу суумалаах харчынан бириистэр туттарыллыбыттара.
Быйыл үбүлүөйдээх «Ытык Бүлүү алгыстаах ыһыаҕын» чэрчитинэн Бүлүү куоратын «Дьөһөгөй түһүлгэтэ» ипподромҥа бэс ыйын 14-15 күннэригэр Степан Максимович Аржаков төрөөбүтэ 125 сылыгар аналлаах ат сүүрдүүтэ тэриллибитэ.
Даҕатан эттэххэ, Степан Аржаков ат спордун сайдыытыгар, Дьокуускайга ипподром тутуутугар кылаатын киллэрбитэ.
Бүлүү ипподромугар 6 дистанцияҕа Бүлүү, Үөһээ Бүлүү, Ньурба улуустарыттан, Дьокуускайтан аттар сүүрбүттэрэ. Хас биирдии дистанция кыайыылааҕар 60 тыһ. солк., иккискэ – 40 тыһ. солк., үһүскэ – 30 тыһ. солк. харчы сертификаттара, бириистэр, элбэх номинацияларга эмиэ сыаналаах бириистэр туттарыллыбыттара.
Дьөккөнтөн ат спордун энтузиастара Сидор, Иван Ионовтар сүүрүүк аттара 3 дистанцияҕа бастаабыттарын ахтыахха сөп.
Ааспыт күһүн Дьокуускайга ат сүүрдүүтүн сезонун түмүктүүр улахан күрэхтэһиигэ Бүлүү улууһа 2 саастарыгар диэри ыраас хааннаах аттар 1600 м дистанцияҕа сүүрүүлэригэр Степан Аржаков аатынан 300 тыһ. солк. суумалаах харчынан бирииһи туруорбута. 8 ат сүүрбүтүттэн бастакы түөрт кэлбит сүүрдээччилэр ити бирииһи үллэстибиттэрэ.
Быйылгы «Ас-үөл — 2024» өрөспүүбүлүкэтээҕи аһы-үөлү оҥорон таһаарар быыстапка-дьаарбаҥка Степан Максимович Аржаков 125 сылыгар анаммыта. «Сыа Бүлүү» астыыр-үөллүүр кэпэрэтиип кытаанах аҥардаах «Бүлүү» сыр оҥоһуутугар бастакы истиэпэннээх дипломунан наҕараадаламмыта.
Аҕыйах хонуктааҕыта Степан Максимович Аржаков төрөөбүтэ 125 сылыгар анаан Дьокуускайга Саха тыйаатырыгар тэриллибит үөрүүлээх мунньахха С.М.Аржаков аатынан тыа хаһаайыстыбатыгар Судаарыстыбаннай бириэмийэ Нам улууһун «Дайыына» бааһынай хаһаайыстыбатын салайааччытыгар Надежда Поповаҕа туттарылынна.
Сэтинньи 29 күнүгэр Бүлүү куоратыгар тэриллэр «Идэһэ -2024» дьаарбаҥка Степан Аржаковка, тыа хаһаайыстыбатын салаатыгар сылы түмүктүүр тэрээһиҥҥэ Степан Максимович Аржаков аатынан наҕараадалар туттарыллыахтара.
Николай Куприянов.