Үгүлээккэ нэһилиэк баһылыга Октябрь Лукин салалтатынан саха ынаҕын иитэргэ, саҥа хотону туттарга эрчимнээх хамсааһын саҕаланан эрэр.
Олунньу ортотугар Үгүлээккэ «Үнүгэс» кэпэрэтиип хотоно умайарыгар ынах сүөһү барыта уокка былдьанан, үгүлээттэр саха ынаҕын иитэр элбэх сыллаах үлэлэрэ күл-көмөр буолбута.
Үгүлээккэ саха ынаҕын иитэр санаалаах өссө 2019 сыллаахха «Саха ынаҕа» судаарыстыбаннай тэрилтэни кытта дуогабардаһан саха оҕустарын атыыласпыттара, 2024 сыллаахха улуус дьаһалтатын өйөбүлүнэн 50 саха ынаҕын эбии ылбыттара, саҥа хотону бары түмсэн туппуттара…
Билигин Үгүлээккэ саха ынаҕын атыылаһар, саҥа хотону туттар санаалаах хамсааһын саҕаланан эрэр. Биһиги нэһилиэк баһылыгын Октябрь Лукины көрсөн, туох-ханнык саҕалааһын тахсыбытын ыйыталаспыппытыгар, кини бу курдук быһааран биэрдэ:
— Хотоммут умайбытын кэннэ салгыы хайдах үлэлиибит, хайдах барытын чөлүгэр түһэрэбит диэн толкуйга түспүппүт. Улуус, тыа хаһаайыстыбатын департаменын салалтатын, нэһилиэк олохтоохторун кытта сүбэлэспиппит уонна салгыы үлэлэһэргэ быһаарыммыппыт.
Иэдээн буолбутун кэннэ өрөспүүбүлүкэтээҕи Кыра уонна орто урбааны өйүүр пуонда салайааччыта Петр Максимов эрийэ сылдьыбыта. Кини пуонда итинник түбэлтэлэргэ кыра бырыһыаннаах сойуом үбүн биэрэн көмөлөһөрүн эппитигэр биһиги сөбүлэспиппит. Улууска сүбэлэһии кэннэ «Тыа хаһаайыстыбатын салаатыгар кыра кыамталаах эбийиэктэри тутуу» быйылгы бырагырааматыгар киллэриэхпит, субсидия үбүнэн өйүөхпүт диэн көмөлөһөллөрүн биллэрэн эрэннэрбиттэрэ.
Билигин биһиги суолу баттаһа хотон тутуутугар наадалаах матырыйааллары тиэйэр санаалаахпыт, пуонда, сатаннаҕына, бу нэдиэлэҕэ үбүн аһардыахтаах. Билигин үппүт-харчыбыт кырыымчык, тутуу матырыйаалларын тиэйиигэ-таһыыга Ил Түмэн депутата, «Сахатранснефтегаз» кылаабынай инженерэ Александр Гоголев өйөбүл оҥоруо диэн улахан эрэллээхпит.
Хотону субуотунньугунан нэһилиэкпит дьонун, «Хотугу Бүлүү» МАУ көмөлөрүнэн тутуохпут. Билигин «Үнүгэс» кэпэрэтиип салайааччыта Анатолий Терешкин матырыйааллары аҕалтараары сүүрэ-көтө сылдьар.
«Саха ынаҕа» судаарыстыбаннай тэрилтэ көмө быһыытынан икки саха оҕуһун кытта ынахтары биэриэхтээх. Бүлүү улууһун хаһаайыстыбалара 30 тахса туҥуйу биэрэллэрин эрэннэрбиттэрэ. Оччоҕо биһиги 50-ча сүөһүлэниэхтээхпит, — диэн Үгүлээт нэһилиэгин баһылыга Октябрь Лукин билиһиннэрдэ.
Үгүлээккэ саха ынаҕын иитэр, саҥа хотону туттан үлэлиир санаалаахтара, кинилэргэ ыарахан, уустук кэмҥэ кэпэрэтииптэр, тэрилтэлэр, улуус салалтата илиилэрин уунан күүс-көмө буолбуттара хайҕаллаах суол буоларын бэлиэтиир тоҕоостоох.
Николай Куприянов.