Олунньу 7 күнэ үүнэр түүнүгэр Үгүлээккэ «Үнүгэс» кэпэрэтиип хотоно умайбытын туһунан хомолтолоох сурах тарҕаммыта. Манна 56 саха ынаҕын сүөһүтэ, ол иһигэр, 22 ыанар ынах уокка былдьаммыттара. Үгүлээттэр бу иэдээн содулларын туоратыахпыт, саҥа хотон туттарыахпыт диэн иһитиннэрбиттэрэ. Ол курдук эппит тылларыгар туран, бу күннэргэ 432 кв. м иэннээх хотону саҥардан оҥордулар. Бу улахан үлэ СӨ Предпринимательствоҕа пуондатын өйөбүлүнэн, олохтоох бүддьүөт үбүнэн уонна нэһилиэк олохтоохторун көхтөөх кыттыыларынан ыытылынна.
Хотон тутуутугар нэһилиэк дьоно бүттүүн үс төгүл улахан субуотунньуктары тэрийэн, 60 киһи үлэлээтэ. СӨ Предпринимательствоҕа пуондата, салайааччы П.Ф. Максимов, сойуом дуогабарын быһыытынан 3 500 000 солк. үп-харчы анаабыт, 1 000 000 солк. — олохтоох бүддьүөт үбэ, 900 000 солк. — «Сыа Бүлүү» СХПК уонна Бүлүү куоратын тэрилтэлэрин спонсордыыр көмөлөрө. Чинэкэттэн төрүттээх Дьокуускай к. олохтооҕо, предприниматель Иван Семенов 14 евро түннүгү бэлэхтээн, Бүлүү куоратыттан предприниматель Надежда Егорова чэпчэтиилээх сыананан уонна рассрочкаҕа тутуу матырыйаалларын биэрэн бөдөҥ кылааты киллэрдилэр. Тутуу матырыйаалларын бэлэмнээһиҥҥэ, докумуоннарын бириэмэтигэр оҥорууга ГКУ «Үөһээ Бүлүү лесничествота», «Бүлүү лесничествота» көмөлөстүлэр. Олохтоох нэһилиэнньэ 180 000 солк. харчынан көмөнү оҥордо.
Арболиттан тутуллубут хотон каркаһын тимир турбаларын «Сахатранснефтегаз» АО УДиТГ спонсордаата, салайааччы В.П.Ильченко, оттон тутуу матырыйаалларын тиэйиини-таһыыны АО «Сахатранснефтегаз» СМУ, салайааччы Андрущенко В.В., оҥорбута.
Бу улахан, үйэлээх тутуу туһунан сиһилии «Олох суола» хаһыат алтынньы 23 күнүнээҕи нүөмэригэр ааҕыҥ.