Бүлүү улууһун бэтэрээннэрин Сэбиэтин уочараттаах пленумугар үүммүт сыл былааннарын бигэргэттилэр, 2024 сыл түмүктэринэн үчүгэй үлэлээх нэһилиэктэр Сэбиэттэрин бэлиэтээтилэр. Тохсунньу 22 күнүгэр Култуура Дыбарыаһыгар ыытыллыбыт пленумҥа 67 делегат кытынна. Мунньаҕы улуус бэтэрээннэрин Сэбиэтин бэрэссэдээтэлэ Федор Федорович Николаев салайан ыытта.
Бүлүү улууһун дьаһалтатын дьыалаларын управляющайа Клара Валериановна Гаврильева, Елена Николаевна Федорова уонна улуус Сүбэтин бэрэссэдээтэлэ Виктор Николаевич Платонов кыттыыны ыллылар. Клара Гаврильева улуус дьаһалтатын үлэтин-хамнаһын уонна инники былааннарын кэпсээн туран, улуус наҕараадаларын туттарда.
Пленумҥа 6 боппуруос көрүлүннэ уонна үөрүүлээх быһыыга-майгыга президиум чилиэннэригэр уонна нэһилиэк бэтэрээннэрин Сэбиэттэрин бэрэссэдээтэллэригэр туоһулуур дастабырыанньалар туттарылыннылар, онтон биэс бэтэрээҥҥэ Махтал суруктар бэрилиннилэр.
2024 сылга бэтэрээннэр сэбиэттэрин бэрэссэдээтэллэрин икки ардыларыгар куоталаһыы түмүгүн таһаардылар.
Улахан нэһилиэктэргэ:
1 миэстэ — Чернышевскай нэһилиэгэ, бэрэссэдээтэл Сортоева Раиса Павловна.
2 миэстэ — 1 Күүлэт нэһилиэгэ, бэрэссэдээтэл Васильева Клара Петровна.
3 миэстэ — Баппаҕаайы нэһилиэгэ, бэрэссэдээтэл Николаева Александра Алексеевна.
4 миэстэ — Тылгыны нэһилиэгэ, бэрэссэдээтэл Петрова Людмила Прокопьевна.
Орто нэһилиэктэргэ:
1 миэстэ – Тоҕус нэһилиэгэ, бэрэссэдээтэл Алексеева Мария Николаевна.
2 миэстэ – Кыргыдай нэһилиэгэ, бэрэссэдээтэл Кырбасова Павлина Дмитриевна.
3 миэстэ – 1 Тоҕус нэһилиэгэ, бэрэссэдээтэл Митясова Акулина Тимофеевна.
4 миэстэ – Лөкөчөөн нэһилиэгэ, бэрэссэдээтэл Дмитриева Розалия Николаевна.
Кыра нэһилиэктэргэ:
1 миэстэ – Өкүндү нэһилиэгэ, бэрэссэдээтэл Мандарова Феодосия Алексеевна.
2 миэстэ – Хаҕын нэһилиэгэ, бэрэссэдээтэл Еремеева Оксана Христофоровна.
3 миэстэ – Бороҕон нэһилиэгэ, бэрэссэдээтэл Спиридонов Март Михайлович.
4 миэстэ – Бөкчөҥөө нэһилиэгэ, бэрэссэдээтэл Трофимова Ольга Васильевна.
Кыайыылаахтарга кубок, анал лиэнтэ, «Үчүгэй үлэлээх бэтэрээн Сэбиэтин бэрэссэдээтэлэ» диэн анал лиэнтэ уонна спортивнай халандаар туттарылынна.
Хас боппуруос аайы анал быһаарыы ылылынна. Ол курдук:
— 2025 сылга Улуу Кыайыы 80, Г.И.Чиряев төрөөбүтэ 100, Бүлүү улууһа төрүттэммитэ 95, Иван Гоголев төрөөбүтэ 95 сылларын көрсө ыытыллар бары общественнай-политическай тэрээһиннэргэ көхтөөхтүк кыттарга;
— Улуус бэтэрээннэрин Сэбиэтэ — уопсастыбаннай тэрилтэ, улуус дьаһалтатын социальнай эйгэҕэ үлэлиир салааларын кытта Кыайыы 80 сылыгар аналлаах биир ситимнээх үлэни ыытарга;
— Хас биирдии сэрии, тыыл бэтэрээнэ, сэрии сылын оҕото нэһилиэк уопсастыбанньыктарын, үлэ кэлэктиибин болҕомтотугар сылдьарын тэрийсэргэ;
— Кыайыы 80 сылын көрсө билигин баар 3 сэрии бэтэрээнин, 5 сэрии кыттыылааҕын огдооболорун, 58 тыыл бэтэрээннэрин, 347 сэрин сылын оҕолорун хас биирдиилэрин ахтыытын ыларга, оскуола оҕолорун кытта үлэлэһэн, хомуллубут матырыйаалы А.И.Николаев аатынан Албан аат түмэлигэр үөрүүлээх быһыыга туттарыыны тэрийэргэ быһаардылар.
Улуус бэтэрээннэрин VIII Спартакиадатыгар урукку бэтэрээн Сэбиэтин бэрэссэдээтэлэ Герасим Алексеевич Солтуев аатын биэрэргэ этии киирдэ. Бүтэһигэр бэтэрээннэр итии чэй иһэн, ырыа ыллаан дуоһуйуохтарыгар диэри астынан тарҕастылар.
«Олох суола».