Балаҕан ыйын 11 күнүгэр 2 Күүлэт нэһилиэгэр Кыайыы скверигэр Улуу Кыайыы 80 сылыгар аналлаах Фашизм сиэртибэлэрин Аан дойдутааҕы күнүн бэлиэтээтибит.
Н.А. Алексеев аатынан 2 Күүлэт орто оскуолатын үөрэнээччилэрэ «Аллея памяти» диэн ааттаан, эйэлээх олох туһугар олохторун толук уурбут байыастарга өйдөбүнньүк мас олортулар.
Ол кэннэ кэриэстэбил мүнүүтэтигэр бары сүһүөхпүтүгэр туран сэрии толоонугар охтубут буойуннарбытын ахтан-санаан аастыбыт.
Олохтоох дьаһалта исписэлииһэ, устуоруйа учуутала өрүү ыраас халлаан, эйэлээх олох баар буоллун диэн тыл эттилэр, маннык иэдээннээх сэрии аны хаһан да буолбатын диэн түмүктээтилэр.
Бу норуот сомоҕолоһуутун көрдөрөр биир кэлим ыытыллар тэрээһини Н.А. Алексеев аатынан 2 Күүлэт орто оскуолатын иитэр үлэҕэ дириэктэр сүбэһитэ Е.М. Петрова, олохтоох бибилэтиэкэ үлэһитэ М.В. Васильева уонна «Дьүкээбил» сынньалаҥ киинин үлэһиттэрэ тэрийэн ыыттылар.
Христина Иванова, 2 Күүлэт.