Олунньу 17 күнүттэн Бүлүү улууһугар үс бөлөҕүнэн Саха Өрөспүүбүлүкэтин Бырабыыталыстыбатын 2025 сыллааҕы үлэтин отчуотун туруоруу күргүөмнээхтик саҕаланна.
Бүлүү улууһугар Саха Өрөспүүбүлүкэтин Бырабыыталыстыбатын отчуотун туруорар үһүс бөлөх салайааччыта, эдэр ыччат дьыалатыгар уонна социальнай алтыһыыга миниистир, байыаннай дьайыы кыттыылааҕа Петр Шамаев киэһэ 17 чаастан Бөтүҥ олохтоохторун кытта көрүстэ, ааспыт сылга өрөспүүбүлүкэ ситэриилээх былааһа ыыппыт үлэтин билиһиннэрдэ.
Былырыыҥҥы отчуокка бөтүҥнэр боротокуолга киллэртэрбит 3 туруорсууларыттан биир да быһаарыллыбатаҕа, «үлэҕэ сылдьаллара» этилиннэ.
Итиннэ суолу оҥоруу, иһэр уунан хааччыйыы, Оруктаах систиэмэтин ситэрии киирэллэр.
Бөтүҥнэр былырыыҥҥы курдук ууну түһэрэр, нүөлсүтэр хас да күөлү ситимниэхтээх уонна өлгөм от үүнүүтүн хааччыйыахтаах Оруктаах систиэмэтин ситэрэри күүскэ туруорустулар.
Өрөспүүбүлүкэтээҕи мелиорация управлениетын кылаабынай мелиоратора, Тыымпыттан төрүттээх Валерий Андреев үбүлээһин кэмигэр оҥоһуллубутун, үлэтин ситэрбэтэх бэдэрээччиги — «Капитал» ХЭУоны суукка биэрбиттэрин билиһиннэрдэ.
Улуус баһылыгын бастакы солбуйааччы Иван Евсеев тендер сокуона итэҕэһинэн тиэхиньикэтэ суох бэдэрээччит аукциоҥҥа кыайан, үлэни ылан, саҕалаан иһэн… тохтообутун иһитиннэрдэ.
Миниистир Петр Шамаев үлэни тиһэҕэр тиэрдэргэ ситэри быһаарсыахтарын чуолкайдаата.
Бөтүҥ олохтоохторо Бөтүҥтэн федеральнай суолга диэри суолу оҥорууну эмиэ туруорустулар. Хаһыс да сылларын…
Отчуокка тырааныспар уонна суол хаһаайыстыбатын министиэристибэтин департаменын салайааччы, Бөтүҥтэн төрүттээх …Амма Бөтүҥүттэн, Александр Данилов ити суол муниципальнай бас билии буоларын, суолу оҥорууга улуустар сайаапкаларынан үбүлээһин оҥоһулларын, кэлиҥҥи 3 сылга Бүлүү улууһугар 300-400 мөл солк субсидия көрүллүбүтүн, Бөтүҥтэн сайаапка киирбэтэҕин быһаарда.
Петр Шамаев боппуруоһу быһаарыыга улууһу, министиэристибэни кытта үлэлэһиэхтэрин, суолу оҥоруу туруорсуута боротокуолга киирбитин иһитиннэрдэ.
Итини тэҥэ, бөтүҥнэр өртөөһүн боппуруоһун эмиэ туруордулар, хаһан көҥүллэниэн сөбүн туоһуластылар. Ити боппуруос Госдумаҕа эрэ быһаарыллара, өрөспүүбүлүкэ үлэлэһэрэ этилиннэ.
Отчуокка олохтоохтортон култуура улахан тэрээһиннэрин тохтоторго, көрүллэр үбү байыаннай дьайыы кыттыылаахтарын хааччыйыыга аныырга этии киирдэ, болҕомтоҕо ылылынна.
Петр Шамаев байыаннай дьайыы кыттыылааҕын, дьиҥнээх балаһыанньаны билэр киһи быһыытынан сөптөөх быһаарыыны оҥордо, бэйэтин санаатын үллэһиннэ.
Бүлүү улууһун куратора, миниистир Петр Шамаев бөтүҥнэр туруорсар боппуруостарын 20-лии сыл «соспокко», «кэпсэтиигэ» кубулуппакка тиһэҕэр тиэрдэргэ чопчу үлэлэһии ирдэнэрин бэлиэтээтэ.
Түмүккэ, олохтоохтор бэйэлэрэ аһаҕас, кырдьыктаах кэпсэтии тахсыбытын бэлиэтээтилэр.
Отчуокка «СӨ судаарыстыбаннай баһаарынай сулууспа» тэрилтэ начаалынньыга Руслан Босиков, үлэ уонна социальнай сайдыы министиэристибэтин департаменын салайааччы Августина Пермякова, «СӨ судаарыстыбаннай сакаасчыгын сулууспата» управлениетын салайааччы Никифор Саввинов уо.д.а. кытыннылар.
Николай Куприянов.