- Хаҕыҥҥа СӨ бырабыыталыстыбатын отчуота олунньу 18 күнүгэр тэрээһиннээхтик ыытылынна. СӨ Бырабыыталыстыбатын бэрэссэдээтэлин солбуйааччыта Анатолий Аскалонович Семеновка тус приемҥа элбэх киһи суруттаран сырытта, сыллааҕы үлэ туһунан дакылаат кэнниттэн аһаҕас, сэргэх кэпсэтии буолла.
Дьону ордук гаас кэлиитин боппуруоһа долгутара билиннэ. Ол курдук, Бүлүү улууһа өрөспүүбүлүкэни барытын гааһынан хааччыйан олорор эрээри, бэйэтин 7 нэһилиэгэ (ол иһигэр Хаҕын) гаастана илик. Гаастааһын биир тыын боппуруос буоларын ким да мэлдьэспэт. Ол эрэн кэккэ сылларга арҕаа дойдулар санкцияларынан дойдуга үп-харчы балаһыанньата уустугурбутунан, АЛРОСА хампаанньа дивидена кэлбэт буолбутунан сибээстээн бу үлэ биллэрдик атахтанна.
Хаҕын олохтоохторо саҥа модульнай ФАП тутуутун туруорустулар.
Ил Түмэн депутата, улуус киин балыыһатын кылаабынай бырааһа Егор Анатольевич Григорьев үүммүт сылга “акт износа здания” оҥотторон баран, 2028 с. диэри ФАП тутуутун нац.бырайыакка киллэрэргэ үлэлиэхпит диэн бигэргэттэ.
Саҥа оскуола, эдэр специалистарга уопсай дьиэ тутуллара наадалааҕын эттилэр.
Олохтоох ПК-ҕа 80 мөл.солк. сметнай сыаналаах хотон тутуута бэдэрээтчит буруйунан тохтоон турарын этиннилэр. Анатолий Аскалонович бу дьыаланы болҕомтоҕо ылан боротокуолга киллэттэрэргэ соруйда.
Мантан салгыы үүт туттарыытын, ОДьКХ балаһыанньатын туһунан уо.д.а. боппуруостар сиһилии хоруйданнылар.
Изольда Загитова.