Кыргыдай нэһилиэгэр Саха Өрөспүүбүлүкэтин ситэриилээх былааһын отчуотун Бырабыыталыстыба бэрэссэдээтэлин солбуйааччы Анатолий Аскалонович Семенов туруорда. Мунньахха дириҥ хорутуулаах, санаа атастаһыылаах кэпсэтии таҕыста.
Анатолий Аскалонович нэһилиэккэ сырыытын кэмигэр биирдиилээн дьону кытта кэпсэттэ, Кыргыдай оскуолатыгар бара сырытта. Кыргыдайдар биир сүрүн туруорсуулара – оскуола тутуута буолар. Мунньахха элбэх киһи бу боппуруоһу көтөхтө. Нэһилиэк дьоно этэринэн, бу боппуруос ааспыт үйэ 60-70-с сылларыттан көтөҕүллэр эбит. 
Хомойуох иһин, иитии, үөрэтии өттүнэн бастыҥ көрдөрүүлэрдээх оскуола хас да кыракый приспособленнай дьиэлэргэ кыбыллан олорор. Саҥа оскуола ПСД-та оҥоһуллан экспертизаны ааһыахтаах. Анатолий Аскалонович оскуола тутуутун инвест-бырагыраамаҕа киирэрин туруорсуоҕум, хонтуруолга ылыаҕым диэн бигэргэттэ.
Оскуола дириэктэрэ Николай Николаевич Кучутов Бырабыыталыстыба бэрэссэдээтэлин солбуйааччытыгар оскуола тутуутун туһунан 100 киһи илии баттааһыннаах көрдөһүү сурук туттарда. 2028 сыллаахха Кыргыдай оскуолатын 100 сыллаах үбүлүөйэ буолар, онон сибээстээн үбүлүөй хамыыһыйатын тэрийиэххэ, мин хамыыһыйа бэрэссэдээтэлинэн буоларга сөбүлэһэбин диэн Анатолий Аскалонович бэйэтэ тыл киллэрдэ. Онон бу дьыала оннуттан сыҕарыйда дуу диэҕи баҕарыллар.
Кыргыдайдар оскуола туруорсаллара оруннаах, биллэн турар, ханна саҥа, тупсаҕай оскуола баар – онно дьон-сэргэ олохсуйар, ыччат тэнийэр. Олохтоохтор быйылгы сылга баһаардар тахсыылара элбээбиттэринэн сибээстээн АДПИ туруорар олус наадалааҕын ыйдылар. Нэһилиэк баһылыга Алексеев Эльдар Эдуардович олохтоох дьаһалта бэрэбиэркэ ыытан, нэһилиэк 120 ыалыттан 37 ыалга АДПИ суоҕун быһаарбытын, күн бүгүн нэһилиэккэ сакаастаммыт 37 АДПИ кэлиэхтээҕин билиһиннэрдэ.
Маны таһынан олохтоохтор тыа хаһаайыстыбатыгар сыһыаннаах, мелиорация үлэтин, суотабай сибээс, пенсияҕа тахсыы сааһын, учаастактааҕы балыыһа туһунан боппуруостары биэрдилэр.
Изольда Загитова.