Олунньу 17 күнүгэр Саха Өрөспүүбүлүкэтин судаарыстыбаннай былааһын толорор уорганнарын 2025 сыллааҕы үлэ түмүктэрин туһунан отчуота Лөкөчөөн нэһилиэгэр ыытылынна.
СӨ Бырабыыталыстыбатын бэрэссэдээтэлин солбуйааччы Анатолий Аскалонович Семенов салайааччылаах бөлөх кыттыылаахтара нэһилиэк олохтоохторун кытта ирэ-хоро кэпсэттилэр, тыа сирин дьонун кыһалҕатын болҕомтоҕо ылан, сиһилии эппиэттэри биэрдилэр, этиилэрин боротокуолга киллэрдилэр. Былырыыҥҥы отчуот боротокуолугар Лөкөчөөн нэһилиэгиттэн 9 боппуруос баар, ол онтон 2 туолбут, 4 үлэҕэ сылдьар уонна 3 кыайан туолбатах. Ол курдук 4G суотабай сибээскэ көһүү боппуруоһа туолбутунан ааҕыллар – «Вымпелкоммуникации” хампаанньа “Билайн” уонна “Мегафон” суотабай сибээһи нэһилиэккэ үлэҕэ киллэрбит.
Нэһилиэк олохтооҕор Харлампьев Афанасий Кузьмичка оту тиэйиигэ тыа хаһаайыстыбатын министиэристибэтэ үп-харчы өттүнэн көмөлөспүт. Модульнай хочуолунай тутуута ОДьКХ линиятынан көрүүгэ сылдьар. Трассаны сырдатыы — транспорт уонна суол-иис хаһаайыстыбатын министиэристибэтэ, ыраас уунан хааччыйыы — Минпромгеологии, мелиорация ханаалларын турбаларын уларытыы — тыа хаһаайыстыбатын министиэристибэтин көрүүлэригэр үлэҕэ сылдьаллар.
Кыаттарбатах боппуруостар эмиэ бааллар. Лөкөчөөн нэһилиэгин олохтоохторун биир сүрүн боппуруостарынан “Бүлүү” федеральнай айан суолун учаастага нэһилиэк иһинэн ааһарынан сибээстээн, гравий бүрүөһүннээх буолан сайыҥҥы өттүгэр суол быыла дьон олоҕор-дьаһаҕар кэккэ ыарахаттары үөскэтэрин, доруобуйаҕа буортулааҕын, манан сибээстээн суол учаастагын аспааллааһына ирдэнэрин, маны сэргэ хараҥа кэмҥэ сатыы дьоҥҥо куттал үөскээбэтин туһугар суолу сырдатыы наадалааҕын этиннилэр. Анатолий Аскалонович суолу сырдатыы боппуруоһа 2028 сылга, аспааллааһын 2030 сылга диэри быһаарыллыахтааҕын бигэргэттэ. Нэһилиэк дьоно олоххо куттала суох буолуу усулуобуйатын туһунан саамай сөпкө туруоралларын бэлиэтээн баран, суол-иис уонна тырааныспар министиэристибэтин кытта бу боппуруоска ыкса үлэлэһиэхпит диэн эттэ. Отчуот кэмигэр оскуола тутуутун, гаастааһын, хочуолунай кыамтатын үрдэтии, өртөөһүн, тыа сиригэр ыччаты олохсутуу, аварийнай-быыһыыр сулууспа пуунун арыйыыны тула кэпсэттилэр. Нэһилиэк олохтоохторун ыйытыылара боротокуолга киирдилэр.
Изольда Загитова.