Бүлүү улууһуттан анал байыаннай дьайыыга сылдьар биир дойдулаахтарбытыгар улуустааҕы көмө оҥорор пуун байыаннай дьайыыга хомуур саҕаланаатын 2022 сыл балаҕан ыйын 29 күнүттэн тэриллэн, Бүлүү куоратыгар Чапаев уулуссатын 20б нүөмэригэр турар “Балаҕаҥҥа” иккис сылбытын тиһигин быспакка үлэлии сылдьабыт.
Күн бүгүҥҥэ диэри туох көмө оҥоһулларын туһунан кылгастык кэпсиэхпин баҕарабын.
Көмө оҥорор пууҥҥа 4 буолан үлэлиибит, Мария Петровна Томская Бүлүү улууһун уопсастыбаннай түмсүүлэрин уонна көмө оҥорор пуун салайааччыта, Елена Яковлевна Сивцева Бүлүү улууһун уопсастыбаннай түмсүүлэрин, көмө оҥорор пуун салайааччытын солбуйааччыта, “Стимул” түмсүү салайааччыта, Екатерина Герасимовна Алексеева “Алаһа” түмсүү салайааччыта, Валентина Михайловна Кононова “Стимул” түмсүү чилиэнэ. Балаҕаҥҥа иистэнэбит, маскировочнай сетка өрөбүт, харысхаллары оҥоробут, уоппускаҕа кэлэ сылдьар, бэйэлэрэ баҕа өттүлэринэн сулууспалыы барар уолаттарбытыгар 20-тэн тахса араас малы-салы, таҥаһы биэртэлээн ыытабыт, уолаттарбытыгар бэйэлэригэр аадырыстаан баһыылкалары ыыталыыбыт, анал байыаннай дьайыыга сылдьар уолаттарбытыгар уонна кинилэр дьиэ кэргэттэригэр көмөлөһөр сыаллаах гуманитарнай көмө тутабыт.
Биһиги анал байыаннай дьайыыга ыҥырыллан, контрагынан, дуогабарынан барбыт биир дойдулаахтарбытыгар эрэ көмөлөһөр буолбатахпыт, Сахабыт сириттэн байыаннай дьайыыга сылдьар дьоннорбутугар барыларыгар туох кыахпыт баарынан көмөлөһө сылдьабыт.
Аан бастаан ыҥырыллан барбыт уолаттарбыт дьонноругар таҥастара илийэн, бадараан буоларын куурдар да, сууйар да усулуобуйалара суоҕун, имитэн тэбии-тэбии кэтэбит, эппит бааһырар диэн суруйалларын дьонноро кэпсээбиттэрэ. Бүлүү улууһун уопсастыбаннай түмсүүлэригэр ыҥырыы таһаарбытым, харчынан кыттыһан матырыйаал ылан таҥас тигэн, ис таҥас, наскы, ылан ыытыаххайыҥ диэн. Түмсүүлэр суһаллык харчы хомуйан, матырыйаал ылан, комуфляжнай, плащевай көстүүмнэри, ыстааннары тигэн, ис таҥас, наскы, утары туттуллар маллары атыылаһан ыыталаабыппыт. Уолаттарбыт барахсаттар посылка тутан үөрэн махталларын видеонан, суругунан ыыппыттара. Улуустааҕы анал байыаннай дьайыыга сылдьар дьоннорбутугар көмөлөһөр штабтан көмө оҥорор пууҥҥа матырыйаал, фурнитура ыларбытыгар үстэ үп көрдөрөммүт 2022 сылтан байыаннай таҥастары тигэ, харысхаллары оҥоро сылдьабыт. Маны таһынан улуус уопсастыбаннай түмсүүлэрэ бэйэбит харчы хомуйаммыт иистэнэрбитигэр эбии матырыйаал, утары туттуллар маллары, ис таҥастары, футболкалары, влажнай салфетка, мыыла, зубной щетка, паста, наскы атыылаһабыт.
Тигэр таҥастарбыт, малларбыт, оҥоһуктарбыт: байыаннай көстүүм хас да көрүҥүн, ыстаан, ардахтан харыстанар пончо, балаклава, аптечка, плащевай көстүүм, ыстаан, вещмешок, илийбэт матырыйаалтан иһигэр пенафоллаах үс гына хомуллар олбохтору, сылаас сэлиэнчиктэри, флисовай толстовка, камуфляжнай ветровка, кэтиинчэ, куллуку, үтүлүк, кумаартан харыстанар сеткалаах панама, харысхал мөһөөччүгэ, нашлемник, сиэл угунньу, араас харысхал, блиндажнай чүмэчи, армейскай сухой душ, араас размердаах маскировочнай сетка. Тигиллэр таҥаһы улуус уопсастыбаннай түмсүүлэрэ нэһилиэктэртэн киирэн матырыйаалларын ылан тигэн киллэрэллэр, атынын барытын бэйэлэрин харчыларынан атыылаһан оҥороллор. Ыам ыйыгар маскировочнай сетка таҥаһын, сеткатын Баппаҕаайы нэһилиэгин баһылыга Егор Афанасьевич сакаастаан, харчытын улуус төлөөн, 6 улахан урулуон матырыйаалы такси уолаттара уонна Виталий Мандаров, урулуонунан сетканы Сергей Яковлев босхо аҕалан наһаа абыраатылар. Маскировочнай сетка оҥорор 4х4 станокпутун бэйэтин матырыйаалынан Иннокентий Акимов аҕыйах чаас иһигэр оҥоро охсон биэрэн, билигин Дьокуускайга олорор “Үрүҥ көмүс” волонтер Наталья Васильевна Еремисова кэлэн, Тааһаҕартан “Күбэйэ” түмсүү эмиэ уопуттаах өрөөччүлэрэ маастар-кылаас оҥороннор элбэх сетка өрүлүннэ.
“Бүлүү улууһа эһигинниин бииргэ” диэн көмө оҥорор пууммут, «Саха сирэ эйигин кытары» диэн Дьокуускайга баар өрөспүүбүлүкэтээҕи көмө оҥорор пуунун кытары байыаннай дьайыы саҕаланыаҕыттан бииргэ үлэлии сылдьабыт. Байыаннай дьайыыга сылдьар биир дойдулаахтарбытыгар аналлаах элбэх акцияларга кыттаммыт, улууспут уопсастыбаннай түмсүүлэрэ, урбаанньыттар сүрэхпит, илиибит сылааһын иҥэрэн тикпит таҥастарбытын, утары туттуллар маллары-саллары, оскуола, уһуйаан оҕолорун уруһуйдарын, суруктарын, атыылаһан ыыппыт араас минньигэс астарын, олохтоохтор хомуйан биэрбит малларын, астарын, «Сыа Бүлүү» бэйэтэ оҥорор бородууксуйатын уолаттарбытыгар аадырыстаан да туран, көннөрү да элбэхтик көмө оҥорор пууҥҥа илдьэн туттарбыппыт.
Ыам ыйын 29 күнүгэр улуус уопсастыбаннай түмсүүлэрэ, уһуйаан, оскуола, кулууп үлэһиттэрэ, нэһилиэк олохтоохторо техниканы сабарга анаан 16х4, 9х4, 8х4, 8х3 улахан размердардаах 43 устуука маскировочнай сеткалары, Баппаҕаайы нэһилиэгин “Сүрэҕим баҕатынан” түмсүү далбардара оҥорбут 1500 устуука сухой армейскай душтарын «Саха сирэ эйигин кытары» диэн Дьокуускайга Бестужев-Марлинскай 5 нүөмэрдээх дьиэтин 1 куорпуһугар баар өрөспүүбүлүкэтээҕи көмө оҥорор пуун бэрэссэдээтэлин солбуйааччытыгар Анна Николаевна Ефимоваҕа илдьэн туттардыбыт. Көмө оҥорор пуун Орджоникидзе уулуссатын 10-тан киэҥ-куоҥ үчүгэй баҕайы дьиэҕэ көһөн наһаа үчүгэйдик тэринэн үлэлии олороллор. Профессиональнай иистэнэр массыыналар бөҕө кэчигирэһэн аҕай тураллар, тэрилтэлэр спонсордаабыттар, манна ким хайдах бириэмэлээҕинэн кэлэн иистэнэллэр, маскировочнай сетка баайаллар эбит, уопут атастаһан кэллибит. Биһиги бэйэбит массыыналарбытын илдьэ кэлэн иистэнэбит, профессиональнай массыыналары, оверлок спонсардыыллара буоллар наһаа абыраныа этибит. Массыыналарбыт уһуннук тиктэхпитинэ наһаа итийэллэр. Бастаан быстах хомуурга барар уолаттарбытыгар анаан биирдиилээн дьоннор, урбаанньыттар, тэрилтэлэр, улуус уопсастыбаннай түмсүүлэрэ утары туттуллар маллары, таҥаһы, аһы аҕалан наһаа көмөлөспүттэрэ. Билигин улахан көмөҕө наадыйабыт, тигиллэр таҥастары быһан биэрэр киһи наада.
Убаастабыллаах Бүлүүбүт улууһун олохтоохторун, урбаанньыттарын, тэрилтэлэрин, иистэнньэҥнэрин Кыайыыны уһансан кэлэн күүс-көмө буоларгытыгар ыҥырабыт. Биир дойдулаахтарын көмөлөрүн тутан, санаалара сырдаан, бөҕөргөөтүн, уолаттарбыт этэҥҥэ эрэ буоллуннар. Билиҥҥи ыарахан кэмҥэ бары сомоҕоhуулаах буоларбыт хайаан да наада.
Бары биир киһи курдук сомоҕолоһон, анал байыаннай дьайыыга сылдьар уолаттарбыт бары этэҥҥэ дойдуларыгар эргиллэн кэлэллэрин туһугар бары күүһү ууруоххайыҥ!
Билсэр телефоннаргыт: 89142381898, 89644204962 — Томская Мария Петровна,
89243680420 — Сивцева Елена Яковлевна.
Мария Томская,
Бүлүү улууһун уопсастыбаннай түмсүүлэрин,
көмө оҥорор пуун салайааччыта, Бүлүү куоратын бочуоттаах олохтооҕо.