Бэҕэһээ, ахсынньы 17 күнүгэр Саха Өрөспүүбүлүкэтин үөрэххэ уонна наукаҕа миниистирэ Нюргуяна Соколова Н.Г.Чернышевскай аатынан Бүлүүтээҕи профессиональнай-педагогическай колледж үлэтин билистэ. Колледж дириэктэрэ Иван Алексеев миниистир сырыытын бу курдук билиһиннэрдэ:
— Биһиэхэ, ахсынньы 17 күнүгэр, үөрэх уонна наука миниистирэ Нюргуяна Соколова оробуочай сырытыынан кэлэн үлэбитин, былааннарбытын билсэн барда. Миниистири кытта Бүлүүтээҕи профессиональнай-педагогическай колледж сытыытык турар боппуруостарын дьүүллэстибит. Ол курдук, кэпсэтии спортивнай саала тутуутун, Саха Өрөспүүбүлүкэтин Баһылыгын Гранын олоххо киллэрии, выпускниктарга үлэ миэстэтин таһаарыы, устудьуоннар социальнай хааччыллыыларын тула уо.д.а. боппуруостарга барда.
Колледж спорткомплексын тутуу миниистир тус хонтуруолугар сылдьара бэлиэтэннэ, сотору кэминэн судаарыстыбаннай сакаас тэрилтэтэ – СГЗ бырайыактыыр-чинчийэр үлэни ыытарга аукцион биллэриэхтээх. Миниистир колледж уонна министиэристибэ отделларын салалталарыгар сорудахтары биэртэлээтэ.
Бүлүүтээҕи профессиональнай-педагогическай колледж филиалларын Ленскэй уонна Булун оройуоннарыгар арыйар туһунан боппуруос дьүүллэһилиннэ. Бүгүҥҥү күҥҥэ колледж 13 оройуоҥҥа 31 психологическай-педагогическай кылаастар үлэлэрин сүрүннүүр.
Көрсүһүүгэ колледж инники сайдар боппуруостара болҕомтоҕо турдулар.
Үөрэх уонна наука миниистирэ Нюргуяна Соколова «Эрчим» уопсайга сырытта, устудьуоннары кытта кэпсэттэ, дэлэгээссийэ кыттыылаахтара «Эр санааланыы» уордьан кавалердара, кыргыһыы толоонугар охтубут колледж выпускниктарыгар Степан Руфовка уонна Владислав Тарабукиҥҥа аналлаах мемориальнай истиэндэлэргэ сибэкки уурдулар.
Николай Куприянов.