Иван Прокопьев, Тылгыны нэһилиэгин олохтооҕо, 2023 сылтан “Бүлүү улууһа эһигинниин бииргэ” диэн анал байыаннай дьайыы кыттыылаахтарыгар уонна кинилэр дьиэ кэргэттэригэр улуустааҕы көмө оҥорор пууҥҥа тиһигин быспакка иистэнэр. Улуустааҕы “Көмүскэл” иистэнэр эр дьоннор түмсүүлэрин салайааччыта.
Муус устар 11-12 күннэригэр Иван Прокопьев Тылгыны нэһилиэгиттэн киирэн, улуус түмсүүлэрин иистэнньэҥнэригэр анал байыаннай дьайыы кыттыылаахтарыгар байыаннай таҥаһы тигэргэ икки күннээх маастар-кылаас оҥордо.
Илбэҥэ, Тааһаҕар, Бөтүҥ, Өкүндү, Чочу нэһилиэктэриттэн, Бүлүү куоратыттан уопсастыбаннай түмсүүлэр иистэнньэҥнэрэ кэлэннэр үөрэннилэр. Иван кэлбит Далбардарга иис ымпыгын-чымпыгын барытын көрдөрдө, ол курдук: сиик ньымаларын, сиэҕи, сиэби, молнияны, липучканы хайдах сөпкө тигэри, олордору, быыкарайканы быһары, хайдах улаатыннарары, кыччатары барытын наһаа үчүгэйдик көрдөрөн, быһааран биэрдэ.
Кэрэ аҥардар бары Иван оҥорон бэлэмнээбит байыаннай көстүүмнэрин, футболка, бейсболка быыкарайкаларын бэйэлэригэр анал кумааҕыга түһэрэн оҥоһуннулар уонна матырыйаалларга быһаннар икки күн иһигэр биирдии көстүүмү, сорохтор футболкалары, ыстааннары тиктилэр.
Элбэххэ үөрэнэн Иваҥҥа уонна маастар-кылааһы тэрийбит улуустааҕы көмө оҥорор пуун волонтердарыгар улаханнык махтанан, салгыы түмсүүлэр бары тигэрдии матырыйаалларын, фурнитураларын ылан бардылар. Маастар-кылаас ыытыллар кэмигэр Иван уонна Семен уоппускаттан баран эрэр уолга байыаннай, флисовай көстүүмнэри тигэн биэрдилэр уонна уолбутугар мал-сал биэрэн бары атаардыбыт
Хас күн аайы көмө оҥорор пууҥҥа матырыйааллары, фурнитуралары уонна Иван, Семен оҥорон биэрбит көстүүмнэрин, таҥастарын быыкарайкаларын быһан бэлэмниибит, нэһилиэктэр уопсастыбаннай түмсүүлэрэ киирэннэр ону ылан тахсаллар. Уопсайа 280 байыаннай таҥас-сап тигиллэ бэрилиннэ.
Сорох түмсүүлэр тигэн киллэртээн эрэллэр, тигиллибит көстүүмнэрбитин уоппускаҕа кэлбит, кантрагынан барар уолаттарбытыгар 2-3 көстүүмү биэртэлээн ыыталыыбыт. Билигин да тигиллэр таҥас элбэх, улууспут иистэнньэҥнэрэ кэлэн тигэргэ көмөлөһөргүтүгэр ыҥырабыт.
Улуустааҕы көмө оҥорор пуун үлэ бириэмэтигэр сарсыарда 9-тан киэһэ 6 чааска диэри, эбиэккэ тохтобула суох үлэлиир. Көмө оҥорор пуун волонтердара көмөлөһө кэлбит дьоннорбутун кытары бары манна аһыыбыт, Тааһаҕартан “Күбэйэ”, Өкүндүттэн “Утум”, Бөтүҥтэн “Дьүөгэлэр”, “Иис абылаҥа” түмсүүлэр көмө оҥорор пууҥҥа эт, хортуоппуй аҕалан биэрэннэр наһаа үөрдүбүт.
Түгэнинэн туһанан, маастар-кылаас ыыппыт Иван Прокопьевка, кэлэн үөрэммит Далбар хотуттарга, иистэнньэҥ уолбутугар Семен Семеновичка, Тааһаҕар нэһилиэгин “Күбэйэ” түмсүүтүн, Бөтүҥ нэһилиэгин “Дүөгэлэр” түмсүү, Өкүндү нэһилиэгин “Утум” түмсүү Далбардарыгар, Бөтүҥ нэһилиэгин “Дьүөгэлэр” түмсүүтүн иистэнньэҥэр Светлана Ильиничнаҕа, спонсордарбытыгар Чочу олохтооҕор Анисия Николаевнаҕа, куорат олохтоохторугар Ирина, Иван Волковтарга, Ксенья, Валерий Бубякиннарга, Александра Бертяховаҕа бу ыарахан бириэмэҕэ күүс көмө буолар улууспут үтүө-мааны дьонугар бука барыгытыгар “Бүлүү улууһа эһигинниин бииргэ” диэн анал байыаннай дьайыы кыттыылаахтарыгар уонна кинилэр дьиэ кэргэттэригэр улуустааҕы көмө оҥорор пуун волонтердарын, уопсастыбаннай түмсүүлэрин уонна тус бэйэм ааппыттан, барҕа махталбытын тиэрдэбит. Эһиги хас биирдии таҥаска илиигит сылааһын иҥэрэн, уолаттарбытыгар күүс-уох эбэр, харыстыыр-хаххалыыр аналлаах таҥастары тигэҕит. Бары бииргэ биир санаанан салайтаран, эйэлээх олох түргэнник кэлэрин туһугар күүс-көмө буолаҕыт. Күндү дьоммутугар чэгиэн доруобуйаны, дьиэ кэргэҥҥитигэр этэҥҥэ буолууну баҕарабыт.
Мария Томская, улуустааҕы СВО-ҕа көмө оҥорор пуун салайааччыта, Бүлүү куоратын бочуоттаах олохтооҕо.