Кулун тутар 21 күнүгэр Үөһээ Бүлүү Балаҕаннааҕар буойун-мелодист, самодеятельнай композитор, уостан түспэт ырыалардаах Георгий Максимович Никифоров төрөөбүтэ 100 сылын бэлиэтээн «Көтөн тахсыҥ кыталыктар” диэн өрөспүүбүлүкэтээҕи аһаҕас ырыа күрэһэ үрдүк тэрээһиннээхтик ыытылынна.
Кини айан хаалларбыт ырыаларыгар Балаҕаннаах нэһилиэгин дьаһалтата, дьоно-сэргэтэ, төрөппүт кыыһа, сиэннэрэ, хос сиэннэрэ иилээн-саҕалаан, олус диэн өрө көтөҕүллүүлээхтик, элбэх бириистээх, үрдүк тэрээһиннээх ырыа ыһыаҕын тэрийдилэр.
Бу күн Г.М.Никифоров сырдык, үтүө аата Балаҕаннаах култуура дьиэтигэр иҥэрилиннэ.
Ырыа түһүлгэтигэр барыта 160 –тан тахса кыттааччы бөлөҕүнэн уонна биирдиилэн араас улуустартан: Амматтан, Бүлүүттэн, Үөһээ-Бүлүүттэн, Дьокуускай куораттан кытыннылар. Мелодист Георгий Максимович Никифоров ырыаларын бөлөҕүнэн толорууга барыта 16 араас састааптаах ырыа ансаамбыллара кытыннылар, биирдиилээн толорууга барыта 18 кыттааччы күөн көрүстүлэр.
Ырыа бырааһынньыгын Балаҕаннаах нэһилиэгин киэн туттар эдэр ыччаттара: эдэр ыччат политикатын туйгуна, «Саха» НКИХ «Саҥа күн»биэрии биир бастыҥ ыытааччыта Ньургуйаана Ботуева уонна «Олоҥхо-2006″ батл кыайыылаҕа, “Зема” эдэр ыччат түмсүүтүн салайааччыта Михаил Аянитов.
Ырыа түһүлгэтин сүрүн спонсордарынан Георгий Никифоров аймахтара, кыыһа, сиэннэрэ, хос сиэннэрэ, Үөһээ Бүлүү уонна Балаҕаннаах нэһилиэгин бас –көс дьонноро, тэрилтэлэрэ буоллулар, барыта 680-тан тахса тыһыынча солкуобайы хомуйбуттар. Бөлөҕүнэн бастыҥ толорууга 100 тыһыынча уу харчынан, биирдиилээн толорууга эмиэ 100 тыһыынча уу харчынан бирииһи туруордулар.
Бу күрэскэ ыллыыр кумахтаах Тойон Бүлүү, Сыа Бүлүү сириттэн ааттаах-суоллаах 5 ырыа ансаамбыллара: «Сарыада», салайааччы Мария Унарова, Чочу нэһилиэгиттэн «Күбэйэ», салайааччы Ия Чыларова, Кыадаҥдаттан «Күндэли», салайааччы Олимпиада Рыкунова, Тыымпы нэһилиэгиттэн «Уйгу», салайааччылар Иван Константинов, Василий Федоров, Кыргыдай нэһилиэгиттэн «Туйаара», салайааччы Любовь Николаева кытыннылар. Биирдиилээн толорууга 4 ырыаһыт, сыана бэтэрээннэрэ, бүлүүлэр киэн туттар бастыҥ ырыаһыттарбыт — Өкүндү нэһилиэгиттэн Иван Данилов, Бөтүҥ нэһилиэгиттэн Николай Иванов, Бүлүү куоратыттан Матрена Сивцева уонна эдэр кэскиллээх Олег Петров олус ситиһиилэхтик кыттан ырыа күрэһин таһымын үрдэттилэр, олус киэргэттилэр.
Бу улахан тэрээһиннээх өрөспүүбүлүкэтээҕи аһаҕас ырыа күрэһигэр биирдиилээн толорууга Гран-При үрдүк чыпчаалын Бүлүү куораттан криминалист, ыарахан үлэлээх, биир бастыҥ ырыаһыппыт Олег Петров ылыан ылла уонна 100 тыһыынчалаах Г.М.Никифоров оҕолоро, сиэннэрэ туруорбут бириэмийэлэринэн наҕараадаланна. Маны таһынан киниэхэ “Эриэккэс куоластаах” анал аат туттарылынна.
Үһүс үрдэл Лауреат дипломун уонна «Ылбаҕай ырыаһыт» анал ааты Бөтүҥ нэһилиэгиттэн Николай Иванов тутта.
Өкүндү нэһилиэгиттэн Иван Данилов 1 истиэпэннээх Дипломан уонна «Георгий Никифоров ырыатын бастыҥ толорооччу» анал ааты, ону таһынан Николай Хобусаров салайааччылаах народнай оркестр үбүлүөйдээх тэрээһиннэригэр бастакынан ыҥырыы суругу тутан үөрүүтэ үксээтэ.
«Көмүс куоластаах күөрэгэй» үрдүк анал ааты Бүлүү куораттан Матрена Сивцева ылыаҕын ылла.
Бөлөҕүнэн толорууга муҥутуур кыайыылааҕынан «Дуораан» Дүллүкү нэһилиэгин эр дьонун ырыа ансаамбыла буолан, Балаҕаннаах дьаһалтата туруорбут бирииһинэн — 100 тыһыынча уу харчынан наҕараадаланна.
1 истиэпэннээх Лауреат аатын Тыымпы нэһилиэгиттэн «Уйгу» ырыа бөлөҕө, салайааччылар Иван Константинов, Василий Федоров, 3 истиэпэннээх дипломант аатын эмиэ Тыымпыттан «Сарыада», салайааччы Мария Унарова ыллылар.
Бүлүүттэн кыттыбыт бары ырыа ансаамбылларыгар анал ааттар уонна сыаналаах бириистэр туттарыннылар. Бу улахан тэрээһиннээх ырыа күрэһиттэн бары кыттааччылар бэлэх, анал аат ылан үөрүүлэрэ-көтүүлэрэ үксээтэ.
Георгий Никифоров 100 сааһыгар аналлаах бэртээхэй тэрээһин сыалын-соругун ситэн, автор “Эйэ, дьол иһин” диэн ырыатын кини кырачаан хос сиэннэрэ Алена, Оля Спиридоновалар чаҕылхай толорууларынан түмүктэннэ. Ырыа куттаах үтүөкэн дьоммутугар үрдүк ситиһиилэринэн эҕэрдэ бастыҥа! Өссө да маннык ситиһиилэр кэлэ турдуннар. Дом!
Елена, Иван Туласыновтар.