Бастакы түмсүүгэ Ийэлэр күннэринэн сибээстээн дэриэбинэ далбардарын кытта араас көрүҥҥэ маастар-кылаастар ыытыллыбыттара. Ол курдук учуутал Вера Петровна оҕолорго баттах туттарыытын хайдах оҥорору ийэлэргэ, эбээлэргэ үөрэттэ.
Быйыл сайын ойуурга отон олох үүммэтэ. Онон Степанида Владимировна битэмииннээх утаҕы оҥорон амсатта, билигин атыыга баар үүнээйилэринэн, рецебэ маннык: 1 киилэ моркуоп, киилэ аҥаара дьаабылака, 200 гр саахар, 1 кыра луоска лимоннай кислота, икки аҥаар лиитэрэ уу. Маны 40 мүнүүтэ оргутаҕын, кыра гына кырбыыгын, оргуйбутун кэннэ ытыгынан ытыйаҕын. Тумуу кэмигэр маннык оҥостон иһэ сылдьыҥ.
Розалия Васильевна сиэлтэн тугу оҥоруохха сөбүн кэпсээтэ уонна кылы, сиэли хайдах сатаан холбууру үөрэттэ.
Хас биирдии далбар куруук кырасыабайдык көстүөн баҕарара кистэл буолбатах. Ол иһин бүгүн Алена Николаевна ол кистэлэҥнэрин быһааран, кэпстээтэ, чахчы киһи сатаан туттар буоллаҕына, уларыйар эбит диэн итэҕэйдибит.
Халлаан тымныйан эрэринэн сибээстээн, мин халыҥ наскыны бэйэ хайдах оҥоруон сөбүн кэпсээтим, ньэмиэттэри биэртэлээтим, туттуллан бүппүт пласстмас иһиттэргэ иккис тыын хайдах оҥорон туттары быһаардым.
Салайааччыбыт Зинаида Петрова оҕуруонан оҥорбут араас учүгэй оҥоһуктарынан быыстапка тэрийдэ, ньээм сибэккилэрэ тыыннаах курдук хамсыыллар, олус кэрэ оҥоһук тахсыбыт.
СВО-ҕа аналлаах үрүксээктэри оҥоруҥ диэн Мария Петровна таҥас ыыппытын иистэнньэҥ Розалия Васильевна быһан, сороҕун кулуупка тигэн, сороҕун Наталья Иннокентьевна, Галина Николаевна тиксэн көмөлөстүлэр, илиилэрин сылааһын холбоотулар. Мария Прокопьевна уолаттарга 13 ичигэс наскыны ылан көмөлөстө. Саас Анастасия Николаева куораттан таҥас сыыстарын куулунан хомуйан таһаарбытын түмсүүгэ биэрбитэ, онтон сороҕун сайын олбох оҥорон киллэрэн туттарбыппыт, өссө ордон хаалбытынан алта олбоҕу эбии оҥордубут. Онон баһылык солбуйааччытыгар Надежда Павловнаҕа 21 үрүксээги, 6 олбоҕу, 14 харысхаллаах мөһөөччүгү, 13 ичигэс наскыны, 11 “Дойду чэйэ” диэн битэмииннээх от чэй киллэрэн туттардыбыт. Бу барыта СВО-ҕа сылдьар уолаттарбытыгар күүс-көмө буоллун, түргэнник сэрии бүтэн этэҥҥэ дойдуларыгар кэлэллэрин күүтэбит. “Утум ситимэ” түмсүү инники былааннара элбэх, бука бары этэҥҥэ эрэ буолуоҕуҥ.
Федора Николаева, Чочу.
Фото Гелена Степанова.