Ааспыт бээтинсэҕэ Дьөккөҥҥө Советскай Союз Геройа Николай Алексеевич Кондаков аатынан оскуола спорт саалатыгар Саха Өрөспүүбүлүкэтин «Учууталлар учууталлара» бэлиэтин хаһаайына Вячеслав Иванов олоҕун биир кэрэ-бэлиэ түгэнигэр аналлаах оҕолорго хапсаҕайдаһан тустууга таһымнаах күрэхтэһии тэрилиннэ.
Дьөккөн оскуолатыгар физическэй култуура учууталынан таһаарыылаахтык үлэлиир Вячеслав Аврорович спорка элбэх ситиһиилээх. Кини хапсаҕайга спорт маастара, мас тардыһыытыгар «Сахаада-спорт» маастара, Саха өрөспүүбүлүкэтин үөрэҕириитин уонна спордун туйгуна, Саха сирин спордун бэтэрээнэ. Кэлиҥҥи кэмнэргэ Вячеслав Иванов өрөспүүбүлүкэ таһымнаах улахан күрэхтэһиилэргэ, «Манчаары оонньууларыгар», аан дойду чемпионатыгар мас тардыһыытыгар судьуйанан эҥкилэ суох үлэлиир.
Дьөккөҥҥө тэриллибит көбүөргэ Тааһаҕартан, Кыргыдайтан, Хампаттан, Лөкөчөөнтөн, Тыымпыттан, Чинэкэттэн, Кыһыл Сыыртан, Үөһээ Бүлүүттэн, Кэбээйи Мукучутуттан 50 тахса кыра саастаах хапсаҕайдьыт уолаттар сытыы киирсиилэри көрдөрдүлэр.
2015 сыллааҕы төрүөх уолаттарга 30 киилэ ыйааһыҥҥа Дьөккөнтөн Артем Томскай чемпион үрдүк аатын ылла, иккис миэстэни Тамалакаантан Владислав Мальцев, үсүһү – Чинэкэттэн Диамид Крылов ыллылар.
32 киилэҕэ Дьөккөнтөн Айтал Егоров бастаата, Тыымпыттан Айыллаан Еремеев иккис, Лөкөчөөнтөн Никита Луковцев үһүс буоллулар.
2014 сыллааҕы төрүөх уолаттарга 30 киилэҕэ Дьөккөн хапсаҕайдьыта Альберт Петров чемпион буолла, Тыымпыттан Саян Софронеев уонна Мукучуттан Василий Филиппов иккис-үһүс үктэлгэ таҕыстылар.
32 киилэ ыйааһыҥҥа Дьөккөн эрэлэ Нифонт Иванов бастаата, Тыымпыттан Алик Непомнящай уонна Дьөккөнтөн Петр Никонов иккис-үһүс буоллулар.
40 киилэҕэ Кыһыл Сыыртан Максим Панченко тэҥнээҕин булбата, иккис-үһүс үктэллэргэ Дьөккөнтөн Игорь Никифоров уонна Кыһыл Сыыртан Артур Сагидуллин таҕыстылар.
2013 сыллааҕы төрүөх уолаттарга 30 киилэҕэ Хампаттан Айархан Николаев чемпион буолла, Кыргыдайтан Эрхаан Игнатьев иккис, Мукучуттан Арсений Потапов үһүс буоллулар.
Саамай ыарахан ыйааһыҥҥа – 46 киилэҕэ Дьөккөнтөн Эрхаан Иванов бастаата, иккис-үһүс миэстэлэри Мукучуттан Айал Ноговицын уонна Стас Слепцов ыллылар.
Күрэхтэһии абсолютнай чемпионатыгар 20 оҕо күүстэрин холостулар. Муҥутуур кыайыылаах үрдүк аатын Кыргыдайтан Степан Иннокентьев ылла уонна 20 тыһ. солк. бириэмийэлэннэ. Күрэхтэһии кыайыылаахтара, призердара харчынан, бириистэринэн, мэтээллэринэн наҕараадаланнылар.
Ити курдук, Дьөккөҥҥө өрөспүүбүлүкэҕэ биллэр хапсаҕайдьыт, мадьыны, судьуйа, олоҕун спорка анаабыт Вячеслав Иванов бирииһигэр бэртээхэй күрэхтэһии тэрилиннэ, Вячеслав Аврорович үбүлүөйдээх дьоро күнүгэр үөрэтэр оҕолорун төрөппүттэриттэн, Дьөккөн оскуолатыттан, Дьөккөн нэһилиэгин баһылыгыттан Антон Михайловтан, оройуон Сэбиэтиттэн, үөрэх, спорт управлениетыттан, Баһылай Манчаары спорт национальнай кииниттэн, хапсаҕай өрөспүүбүлүкэтээҕи федерациятыттан элбэх Махтал суруктар үөрүүлээх быһыыга-майгыга туттарылыннылар.
«Олох суола».