Кыргыдай нэһилиэгэр аҕам саастаах дьоммутугар анаммыт тэрээһин сылын аайы, сиэр быһыытынан, туспа былааннанан ыытыллар. Ол курдук быйыл эмиэ балаҕан ыйын 28 күнүттэн алтынньы 2 күнүгэр диэри “Туску” норуот айымньытын дьиэтин үлэһиттэрин толкуйунан уратытык, сэргэхтик тэрилиннэ.
Алтынньы 1 күнэ Аан дойдутааҕы аҕам саастаахтар күннэринэн биллэр. Аҕам саастаах дьоммут, эбэлэрбит, эһэлэрбит, ытыктыыр бэтэрээннэрбит, кырдьаҕас эдьиийдэрбит, таайдарбыт… Барахсаттары киһи саныы түстэҕинэ ахтылҕан ураты салгына кууһар. Аҥардас «эбээ» диэн истиҥ тыл, олус мындыр, эйэҕэс, сымнаҕас, элбэх остуоруйалаах, мааны аһылыктаах, сылаас таҥастаах киһини ахта-саныы түһэҕин.
Былыр-былыргыттан аҕам саастаах дьоҥҥо куруук ураты ытыктабылынан сыһыаннаһаллара. Кырдьаҕас киһи этиитэ ыллыктааҕын үрдүктүк туталлара. Кинилэр биһиги тирэхпит, мындыр өйбүт-санаабыт, өбүгэттэн салҕанар ситиммит буолаллар. Араас үйэ ыарахана, үчүгэйэ, уратыта барыта биһиги аҕам саастаах дьоммут саннынан аастаҕа. Олох тупсарын туһугар хара илиилэринэн үлэлээбит ытык дьоннорбут тулуурдарынан, кыһамньыларынан, олоххо дьулуурдарынан киэн туттабыт уонна муҥура суох махтанабыт.
Ааспыт нэдиэлэҕэ аҕам саастаах дьоммутугар анаан, «Маникюр өҥөтө» босхо аныгылыы бэйэни тупсарыы, сэргэхсийии биир хайысхатынан буолла. Эбээлэрбит, эдьиийдэрбит кэлэннэр тыҥырах оҥорторон, эдэрдии харахтара уоттанан үөрэн-көтөн бардылар.
Иккис күн иистэниигэ маастар-кылаас ыытылынна. Эбэлэрбит ас астыырга аналлаах баартык тигиитин биһирээтилэр, матырыйаал аҕалан бэйэлэригэр тигиннилэр. Ону тэҥэ, «Тирамису» диэн десерт аһы түргэнник хайдах бэлэмнии охсорго, бэлэм бородууктанан ас астаан олуһун астыннылар.
Үһүс күн, хаһыс да сылын Константинова Таисия Васильевна баттах кырыйыытын өҥөтүн босхо нэһилиэк кырдьаҕастарыгар аныыр. Кэлэ үөрэммиттэр кэтэһэр үгэстээхтэр, эрдэттэн этэн сэрэтэллэр. Олус наадалаах өҥө тэриллэриттэн Таисия Васильевнаҕа махталлара муҥура суох.
Төрдүс күн – остуол оонньуулара, теннис күрэҕэ. Хабылыкка, хаамыскаҕа, дуобакка күөн көрсүһүү. Ким мындыра, хапсаҕайа, түргэнэ бу оонньууларга быһаарылынна. Хаамыскаҕа Барчалырова Анна Петровна иннин кимиэхэ да биэрбэтэ. Хабылыкка кыайыы өрөгөйө Буслаева Саргылаана Семеновнаҕа тигистэ. Дуобакка, теннискэ Семен Петрович Иванов, Мария Егоровна Осипова тэҥнээхтэрин булбатылар.
Бэһис күн – түмүктүүр күн. «Туску» норуот айымньытын дьиэтигэр «Күһүҥҥү киһи күлбүтүнэн» күһүҥҥү быйаҥ аанын тэлэччи арыйда. Дьиэ кэргэн хаһаайкалара бурдук аһын, оҕуруот аһыттан оҥоһуллубут араас кэнсиэрбэлэри, таҥаһы-сабы, ураты амтаннаах бүлүүдэлэри нэһилиэк дьонугар-сэргэтигэр хото атыылаатылар.Кэлбит ас кураанахтанна, атыылаабыт эрэ астынан, атыыласпыт эрэ дуоһуйан тарҕастылар.
Ол кэнниттэн ааспыты ахтыһа, уруккуну санатыһа итии чэйдээх бырааһынньыктааҕы түмүктүүр остуол тэрилиннэ. Бу остуолга сиэр быһыытынан нэһилиэк тэрилтэтэ барыта кыттыһан ас астаабыттарыгар махталбыт муҥура суох. Бу күн декада устатыгар көхтөөхтүк кыттыбыт, кыайыылаах дьоннорбут ааттара ааттанна. Үөрүүнү үрдэтэр, кыайыыны бэлиэтиир спонсорскай бириистэри туруорбут урбаанньыт Анастасия Егорова, «Илин» бааһынай хаһаайыстыба салайааччыта Анастасия Кырбасова, оскуола, детсад, ОДьКХ тэрилтэлэригэр барҕа махталбытын тиэрдэбит. Истиҥ ырыаларынан бу киэһэни нэһилиэкпит айар талааннаахтара киэргэттилэр, оскуола үөрэнээччилэрэ эҕэрдэлээтилэр. Көрү-нары көҕүлүттэн тутан, араас сэргэх оонньуулары дуоһуйа-астына оонньоотулар, көрсүспүччэ ирэ-хоро кэпсэттилэр, дуоһуйа күллүлэр – бу буоллаҕа этэҥҥэ сылдьыы үөрүүтэ, дьол илдьитэ.
Уонна хаһан… диэбиккэ дылы, күннээҕи түбүктэн сынньанан маннык түмсүүттэн үөрүүнү, олохтон дуоһуйууну ылар ордук туох кэлиэй?!
Аҕам саастаах күннэрин бэлиэтээн Д.А.Гуляев аатынан Кыргыдай орто оскуолатын үөрэнээччилэрэ нэһилиэк кырдьаҕастарыгар истиҥ эҕэрдэлэрэ, сэмэй бэлэхтэрэ, тимуровскай үлэлэрэ былаан быһыытынан салҕанар.
Ити курдук, кырдьаҕас киһиэхэ ытыктабыл уонна махтал бэлиэтэ көлүөнэттэн көлүөнэҕэ бэриллэр ытык иэс. Аҕам саастаах дьоннорбут толору олоҕунан олорон, оҕолоргутугар, сиэннэргитигэр тирэх буолан, өссө да чэгиэнник, дьоллоохтук уһуннук олоруҥ. Хас биирдии күн үтүө, үөрүүлээх эрэ сонуннары аҕаллын.
Василиса Окоемова, Кыргыдай.
Хаартыскаҕа Ульяна Жиркова, Галина Осипова түһэриилэрэ.