Сэтинньи 18 күнүгэр Олоҥхо дьиэтигэр быйылгы күһүҥҥү ыҥырыыга аармыйа кэккэтигэр сулууспалыы барар 12 уолу сахалыы сиэри-туому тутуһан атаарыы тэрилиннэ.
Үтүө тэрээһини байыаннай дьайыы кыттыылаахтарыгар сүҥкэн көмөнү оҥорор улуустааҕы «Харысхал» түмсүү кыттыылаахтара тэрийдилэр. Атаарыы сэрин-туомун В.О.Каратаев аатынан олоҥхо норуодунай кэлэктиибин салайааччы, Саха Өрөспүүбүүкэтин култууратын туйгуна Светлана Иванова иилээн-саҕалаан ыытта.
Быйыл аармыйаҕа ыҥырыллыбыт 12 эдэр уоланнартан аҕыстара — бүлүүлэр, түөртэрэ — үөһээ бүлүүлэр. Уолаттар аармыйаҕа сылдьарга эрдэттэн бэлэмнэнэн үксүлэрэ Бүлүүтээҕи ДОСААФ-ка үөрэнэн, суоппар идэтин баһылаабыттар эбит.
Атаарыы тэрээһинэ алгысчыт, тойуксут, олоҥхону толорооччу, үөһэттэн айдарыылаах Ньургуйаана Саввинова сахалыы көмүлүөккэ аал уоту оттон, алаадьынан, быырпаҕынан айах тутан, сиэл уматан эдэр уолаттар аармыйаҕа этэҥҥэ араҥаччылаах сылдьан кэлэллэригэр алгыс тылларыттан саҕаланна.
Түмсүү кыттыылаахтара аармыйаҕа барааччылары күөрчэхтээх алаадьынан күндүлээтилэр, сахалыы харысхаллары туттардылар.
Улуус баһылыгын социальнай эйгэҕэ солбуйааччы Александр Комаров, Бүлүү уонна Үөһээ Бүлүү оройуоннарын байыаннай хамыһаара Айсен Ефремов, улуустааҕы «Харысхал» үтүө санаалаах көмөһүттэр түмсүүлэрин салайааччытын солбуйааччы Тамара Фомина аармыйаҕа ыҥырыллыбыттарга үтүө тыллары анаатылар, сүбэ-ама биэрдилэр, сулууспалаан дойдуларыгар этэҥҥэ эргиллэн кэлэллэригэр эрэллээхтэрин биллэрдилэр.
Тамара Фомина аармыйаҕа ыҥырыллыбыт уолаттар ДОСААФ-ка үөрэнэ сылдьан Олоҥхо дьиэтигэр кэлэн байыаннай дьайыы кыттыылаахтарыгар анаан хаххалыыр сиэккэлэри баайарга көхтөөх кыттыыны ылбыттарын бэлиэтээтэ, кинилэргэ «Харысхал» түмсүү аатыттан Махтал суруктары туттарда.
Ити курдук, Бүлүү куоратыгар аармыйаҕа ытык иэстэрин толорон сулууспалыы барааччылары сахалыы сиэринэн-туомунан атаарыы тэрилиннэ.
Николай Куприянов.