Дойду ситимэ

СВО-ҕа көмөбүт. “Бүлүү Харысхал” хамсааһын волонтердара сайыҥҥы кэмҥэ ыыппыт үлэлэрин туһунан кэпсиибин.

“Дьоруойдар дойдулара” хамсааһын кыттыылаахтара, “Бүлүү Харысхал” волонтердарын түмсүүтэ анал ба­йыаннай дьайыыга сылдьар уолаттарбытыгар самаан сайыҥҥы акция­ларыгар 680 кг, госпитальга 25 кг, баһыылка оҥорон 83 байыас­тарга анал аадырыстаан, норуот күүһүнэн түмүллүбүт дойду кэһиитин ый аайы иккилии акцияны тэрийэн-хомуйан ыыттыбыт.
Бу унньуктаах бэһис сылын эйэлээх олох туһугар туруулаһа сылдьар уолаттарбытыгар санааларын бөҕөргөтөөрү илии сылааһынан барыта 39 т 580 кг баһыылка оҥоһуллан бигэ тирэх, суон дурда, халыҥ хахха, дойду көмүөлүн күүһэ буолан кыайыыга кынаттаан ыытылынна.
Бэтэрээннэр Сэбиэттэрэ Саха сиригэр тэриллибитэ 40 сылын көрсө ыытыллар Знамяларын эстафеталарыгар Бүлүү ытык кырдьаҕастара, 100 саастарын туолбут Кыайыы бэтэрээннэрэ: кыраайы үөрэтээччи, норуот учуутала Н.И.Афанасьев, “Ворошиловскай стрелок” анал ааттаах, партийнай үлэһит К.Е.Павлов, өрөспүүбүлүкэ бэтэрээннэрин Сэбиэтин бэрэссэдээтэлэ А.Ф.Саввинов волонтер бэтэрээннэри кытта көрсүһүүлэригэр биэс сыл­лаах отчуот оҥоһуллан бигэргэтиллибитэ.
Дьыл кэмнэригэр сөп түбэһиннэрэн дьону көҕүлээн, араас акциялары биллэрэн, нэһилиэктэр баһылыктарын, бэтэрээннэр Сэбиэттэрин бэрэссэдээтэллэрин кытта ыраас халлаан туһугар үлэлэһэбит. Сайыҥҥы кэмҥэ эмтээх оттору хомуйан хатарыыга, сир аһыгар, этиҥ түспүт мастарын бэлэмнээһиҥҥэ болҕомтолорун туһаайабыт. От ыйыгар “Хаптаҕас” акцияҕа Үгүлээт (баһылык Лукин О.И), Дьөккөн олохтоохторо байыас төрөппүттэрэ Айталина Михайловна, Василий Тимофеевич Абрамовтар 55 кг хаптаҕас, “Сыа Бүлүү” (Кондратьев А.А.) барыта 47 уолга үстүү иһит барыанньа, сироп оҥорбуттара ыытылынна. “Кыа уга , кучу ото” акцияҕа Кыргыдай бэтэрээннэрин Сэбиэтин бэрэссэдээтэлэ П.Д.Кырбасова хомуйбут эмтээх отторо мөһөөччүктэнэн барда, ”КүнЭко” НИЭ кыттыылааҕа, гимназия 8 кылааһын туйгунунан бүтэрбит Лиза Архангельская кучу отунан чэбдигирдэр чэйигэр дөлүһүөн, долохуна отонун хатаран, лоһуор оттоон ыытта. Лиза саллааттар ыраас­таналларыгар, алгыстаналларыгар анаан кыа угунан, кытыанынан, киинэн оҥорбут арчыланар түптэтигэр урбаанньыт С.И.Кириков анал истипиэн­дийэ анаан көмөлөстө. Култуура исписэлииһэ Д.Т. Иванов, Үгүлээттэн О.И.Лукин этиҥ түспүт маһын хому­йан аҕалбыттарын харысхал мөһөөччүгэр уган ыыттыбыт.
Тааһаҕартан бэтэрээн уһуйааччы М.Е.Григорьева эмтээх от арааһын хомуйан ыытта. Россия Былааҕын аннынан сомоҕолоһуу күнүгэр Ленин болуоссатыгар кэлбит дьоннор, ыччаттар, оҕолор харыстанар сиэр-туом толорор, арчыланар мөһөөччүккэ кыа уга, эрбэһин, кытыан, этиҥ түспүт тиитин хатырыгын, саллаат отун уган бэлэмнээбиттэрэ. “Ийэ сир ытык кэрэ сирдэрин алгыһа” эко-бырайыагы экстрим Леди анал ааттаах Тамаара – Талбаана Ай тэрийэн, сиэнинээн хомуйбут отторунан 33 мөһөөччүгү оҥоттордо.
Харыстанар, хаххалыыр сиэк­кэлэри хаһан да хотторбот кыайыы бэлиэтинэн тиһэн баайан ыытарбытын уолаттарбыт биһирииллэр уонна анаан телефонунан сакаастыыллар. Бу сайыҥҥы үс ыйга 97 баа­йыллыбыт харыстыыр сиэккэ барда. Ыам ыйыгар Бүлүүтээҕи “Победа” Фонданан 63 030 суумалаах бобина спанбонд матырыйаал сакаастанан, төлөнөн, 12 рулон матырыйаал кэлбитэ. Волонтердар бэйэлэрэ харчынан 66 000 сууманы хому­йан, байыас аҕата А.Н.Семенов көмөтүнэн илим сиэккэтин ылбыттара. 5*8 иэннээх сиэккэ быһыллан, баайыллан, хас биир­дии уолга иккилии сиэккэ угуллан барда.
Бэһис сылбыт сайыҥҥы түмүгүнэн 1097 устуука мас­кировочнай сиэккэ баайылынна. Сайыҥҥы кэмҥэ Чинэкэ бэтэрээннэрин Сэбиэтин бэрэссэдээтэлэ Р.П.Сортоева, Чочу бэтэрээннэрин Сэбиэтин бэрэссэдээтэлэ Е.С.Томская, Бөкчөҥөө бэтэрээннэрин Сэбиэтин бэрэссэдээтэлэ О.В.Трофимова, Өкүндү бэтэрээн­нэрин Сэбиэтин бэрэссэдээтэлэ Ф.А.Мандарова, Тыымпы бэтэрээннэрин Сэбиэтин бэрэссэдээтэлэ А.Т.Митясова, Хампа бэтэрээннэрин Сэбиэтин бэрэссэдээтэлэ Л.И. Павлова, Бороҕон нэһилиэгин баһылыга А.О.Васильев, Кыадаҥда, салайааччы В.В.Томская, куорат түмсүүлэрин салайааччы М.И.Тимофеева, Сосновкаттан К.Марсден аатынан интернат-дьиэ, салайааччы И.Г.Сергина, Тааһаҕар култуу­ратын үлэһиттэрин сала­йааччы К.В.Петрова, сайыҥҥы лааҕыр оҕолоро, дириэктэрэ К.П.Львов, С.М Аржаков аатынан дьиэ кэргэҥҥэ иитиини өйүүр Киин иитиллээччилэрин салайааччы Е.В.Петрова, Кыһыл Сыыртан “Сила горячих сердец” түмсүү, сала­йааччы О.П.Иванова, байыас “Медик Гош” төрөппүттэрэ Протопоповтар, байыас “Акимба” аҕата И.И.Акимов, Аҕа дойду иккис сэриитин оҕото Н.Е.Сивцева, норуот маас­тара П.Д.Ердашева, байыас­тар ийэлэрэ К.М.Семенова, Г.Н.Каратаева, Россия норуотун маастара А.Н.Семенова, волонтердар: С.Н.Алексеева, Л.И.Дмитриева, Е.Н. Константинова, А.П.Евсеева, М.П.Яковлева, Р.Н.Петрова, Н.И.Парникова, С.Т.Иванова, Т.В.Фомина илиилэрин сылааһынан арчы­лаан, тиһиктэрин быспакка баайдылар.
Сүрэх баҕатынан биирдии­лээн дьон ас-таҥас арааһын акция аайы аҕалан туттараллар. Бэтэрээн учуутал И.Е. Петрова, мэлдьи буоларын курдук, илии тутуурдаах кэһиитин аҕалан үөрдэр, Табун (Иванов И.И.) маҕаһыынын үлэһиттэрэ, Чочу, Кыадаҥда “Ил-Эйэ түмсүүтэ”, Тыымпы нэһилиэгиттэн Саха бастакы балеринатын Е.А.Степанова аатынан орто оскуола оҕолоро сайыҥҥы “Сайылык” лааҕырдарыгар ньээм-ньээм сибэккиттэн мүөт оҥорон, “Айыылартан аргыс­таах, айылҕаттан арчы­лаах сырыт! Төрөөбүт сириҥ – уотуҥ алгыһа бухатыырдыы күүһү эккитигэр иҥэрдиннэр, сөптөөх суолунан сирдээтиннэр!” диэн суруктаан ыыттылар. Кэмпэндээйи тууһун хайдах туһанары этэн туран, И.М.Гоголев-Кындыл аатынан Чочу орто оскуолатын оҕолоро “Үрүҥ Айыыларбыт алгыстара кынаттаатын, тыыҥҥытын харыстаатын, хаххалаатын. Кыайыыны-хотуу­ну аҕаллын!” диэн арчы суруктаан ыыппыттара. Дьөккөнтөн байыас ийэтэ А.М.Абрамова баһыылка аадырыһын суруйарга А4 форматтаах кумааҕыны икки пачканы аҕалан биэрдэ.
Быйыл 35 сылын туолбут В.О.Каратаев аатынан “Аар Дьаҕыл” олоҥхоһуттар уонна тойуксуттар норуодунай кэллэктииптэрэ (сал.Иванова С.Т.) Кэбээйигэ ыытыллыбыт 19 Олоҥхо ыһыаҕар олоҥхо толоруутугар “Гран При” ылбыт бириис харчытын (үһүс төгүлүн) эмиэ уолаттарга анаа­тылар. “Утум” фольклорнай лааҕырыгар “Саха сирин уус-уран норуот айымньытын бочуоттаах бэтэрээнэ” анал аат хаһаайката Т.В. Фомина “Аан дойду мин тэлгэһэбиттэн саҕаланар” эко-бырайыагын чэрчитинэн сиэргэ-туомҥа туттуллар харыстанар, арчыланар мөһөөччүктэргэ этиҥ түспүт тиит маһын хатырыгын, кытыан лабаатын, кыа угун икки арааһын оҕолор илиилэринэн мэһийэн, уктаран, саллаат убайдарыгар ыыттылар, уурунуу суруктаах Кыырчах ойуунунан кыайыы иччитигэр дорҕоон таһааран, кыайыы­ны чугаһатар таҥха арчытын оҥордулар.
Бороҕон нэһилиэгин олохтоох­торо эдэр баһылык А.О.Васильев салайыытынан Н.Н.Герасимов илимнээбитин далбар хотуттар А.М.Фомина салайыытынан астаан дьаһайан, уолаттар сөбүлүүр соболорун бороһуок оҥорорго анаан ыыттылар.
Сайыҥҥы акцияҕа МУП “Аптека №5” (дириэктэр С.А.Бубякина) 82000 суумалаах эмтэри биэрдэ. ”Наша Аптека” (дириэктэр З.В.Протопопова) 45 000, ИП “Аптека Фарм+” С.Ф. Егорова 32 000 суумалаах эмтэринэн хааччыйдылар.
Тимир уустарбыт Н.Н. Степанов, С.С.Томскай, С.Н.Осипов, Н.М.Шамаев бэйэлэрэ уһаар­быт тимирдэринэн быһах оҥорон, уолаттарбыт туруктарын бөҕөргөтөн, баһыылка аайы ыытал­лара байыастар сүргэлэрин көтөҕүөн көтөҕөр.
Уолаттар көрдөһүүлэринэн сэрии тэрилигэр харчынан кыттыһыы биир сүрүн хайысхабыт буолар. Сайыҥҥы кэмҥэ Хампа уолугар мотоциклга, Чинэкэ уолугар дроҥҥа сөптөөх суума хомуллан барда. Билигин Күүлэт уолугар Мавик 3 харчыта хомулла турар. Маны таһынан хорсун байыаһы ийэ буорун булларар, тиһэх суолугар атаарыыга байыастар уонна “Бүлүү Харысхал” хамсааһын аатыттан харчы хомуйан, дьонноругар көмөлөһөбүт. Барыта норуот үтүө санаатын көмөтүнэн 8 мөл. 180 тыһ. суума хомуллан, дойду күүһүнэн ба­йыастары бигэ тирэхтээтибит.
Бэс ыйыгар илии сылаа­һынан тиһигин быспакка барар көмөлтө иһин байыас, анал байыаннай дьайыы бэтэрээнэ, хамандыыр Николаев Орлан Игнатьевич бэйэтин 3 мотострелковай батальонун байыан­най чааһын командованиетын сорудаҕынан «За помощь фронту» мэтээллэри аҕалан, 51460 с нүөмэрдээх байыаннай чаас хамандыыра, гвардия майора М. Сабиров аатыттан Махтал суруктаан волонтердарга туттарда.
От ыйыгар байыаспыт “Шприц” аҕата, ырыаһыт Эрхаан волонтердарга махтанан, сынньалаҥ дьоро күнүн Олоҥхо дьиэтигэр тэри­йэн ыытта. “Эбэм алаадьыта” ырыа­тыгар алгыстаах алаадьы иһитин волонтердарга сиэр-туом толорорго анаан байыас аатыт­тан бэлэх уунан үөртэ.
Опорниктар көрдөһүү­лэринэн кинилэр ааттарыгар тулаайах уолаттарга анаан эбии баһыылка оҥоһуллан тиийэрэ үтүө үгэскэ кубулуйда.
Дьэ, ити курдук дойду ситимэ олохтонон, төһө кыах баарынан “Бүлүү Харысхал” аата уоттаах хонуу биэс хайысхатынан кыайыы туһугар баһыылка буолан тиийэн күүстэригэр күүс эбэр. Уолаттарбыт барахсаттар этэҥҥэ эргиллэн, үс саханы үөскэтэ, түөрт саханы төлкөлүү төннөн кэлэн, биһигини кытта бииргэ дьоллоох олохпутун уһансыахтара диэн эрэнэ күүтэбит.

Тамара Фомина-Талбаана АЙ, Ил Дархан А.С.Николаев «Земля героев» бырайыагын “СВОИ” 0142 № дээх кыһыл көмүс бэлиэтин, “За оказание помощи участникам СВО” Донбастааҕы координационнай киин анал мэтээлин, “За помощь фронту” уоттаах хонууттан кэлбит мэтээл хаһаайката, улуус бэтэрээннэрин Сэбиэтин Президиумун чилиэнэ, “Бүлүү Харысхал” хамсааһын үбүн эппиэттээх салайааччыта.