Олоҥхо күнүгэр – сэтинньи 25 күнүгэр Ил Дархан Айсен Николаев олоҥхону, норуот култууратын төрүт үгэстэрин сайыннарыыга, эдэр ыччаты сыһыарыыга үтүөлэрин иһин өйөбүл быһыытынан олоҥхоһуттарга, оһуокай этээччилэргэ, тимир уустарыгар уонна норуот маастардарыгар үөрүүлээх быһыыга-майгыга стипендиялары туттарар үтүө үгэһэ быйыл эмиэ салҕанна.
Олоҥхо күнүгэр Ил Дархан 26 киһиэхэ анал стипендия туттарда. 30 тыһ. солк. суумалаах стипендия ый аайы сылы быһа түһэр. Үс сыл иһигэр 81 олоҥхоһут, оһуокай этээччи, тимир ууһа уонна норуот маастардара стипендия ыллылар.
Ил Дархан стипендияларын Бүлүү улууһуттан икки киһи ылар чиэскэ тигистэ. Чочуттан тимир ууһун Семен Томскайы, Балаҕаччыттан иистэнньэҥ, норуот маастара Анна Семенованы Ил Дархан стипендията анаммытынан истиҥник эҕэрдэлиибит, киэн туттабыт!
Николай Куприянов.