Атырдьах ыйын 28 күнүгэр Н.Г.Чернышевскай аатынан колледжка үөрэҕирии уонна култуура
үлэһиттэригэр «Билиҥҥи кэмҥэ үөрэҕирии эйгэтигэр саха тылын уонна култууратын харыстааһын уонна сайыннарыы» диэн семинар буолан ааста.
Семинарга СӨ Бырабыыталыстыбатын бэрэссэдээтэлин солбуйааччы Сергей Местников, Бүлүү улууһун баһылыга Сергей Винокуров кыттыыны ыллылар. Тэрээһини И.М.Гоголев аатынан кииннэммит библиотека сүрүн бибилитиэкэрэ Луиза Кононова иилээн-саҕалаан ыытта.
Сергей Местников: — Төрөөбүт тылбытын харыстааһын уонна сайыннарыы барыбыт сыалбыт-сорукпут буолар. Төһө баҕарар сахалыы саҥарар эйгэни тэрийэр кыахтаахпыт даҕаны, билиҥҥи кэмҥэ олоххо киириитэ уустуктардаах. Ол биллэн турар, олус хомолтолоох. Билигин элбэх саха оҕото нууччалыы саҥарара, бэйэлэрин тылларын үчүгэйдик билбэтэ кистэлэҥ буолбатах. Бу манна дьиэ кэргэнтэн саҕалаан салалтаҕа тиийэ бары болҕомтобутун ууруохтаахпыт, күүскэ үлэлэһиэхтээхпит.
Семинарга Бүлүү улууһугар төрөөбүт тылы харыстааһыҥҥа туох, ханнык үлэлэр баралларын туһунан сырдаттылар. Олохтоох бэйэни салайыныы, дьаһалталар, тэрилтэлэр саха тылын үлэлэригэр-хамнастарыгар хайдах тутталларын, үөрэх, култуура эйгэтигэр, сир-дойду, нэһилиэк анал аатыгар, тус аакка, бэлиэҕэ тылы туттууга балаһыанньа хайдаҕын кэпсээтилэр. Ол курдук Н.Г.Чернышевскай аатынан профессиональнай-педагогическай колледжка, оскуолаларга, уһуйааннарга саха тылын, култууратын, сиэрин-туомун күүскэ үөрэтэллэрин, тарҕаталларын этиннилэр.
Төрөөбүт төрүт тылбытын кэлэр кэнчээри ыччаппытыгар тиэрдиигэ бэйэбит ситимнээх үлэни ыытан, күүскэ үлэлэһэн ситиһиэххпитин сөп диэн түмүктээтилэр.
Василина Татаринова.