Улуус дьаһалтатын ааспыт сыллааҕы үлэтин отчуотун туруорар улуус баһылыгын бастакы солбуйааччы Иван Евсеев салайааччылаах иккис бөлөх тохсунньу 28 күнүгэр I Тоҕус нэһилиэгин олохтоохторун кытта көрүстэ.
Тыымпы олохтооҕо Вячеслав Семенов отчуоттуур мунньах кэннэ санаатын бу курдук үллэһиннэ:
— Бүгүн I Тоҕус нэһилиэгин олохтоохторо улуус дьаһалтатын ааспыт 2024 сыллааҕы үлэтин отчуотун иһиттибит. Отчуот сүнньүнэн эттэххэ, үлэ барар. Улуус салалтата уруккуттан да, билигин да улуус сайдарыгар ыытар үлэтин биһиги биһириибит. Кыах баарынан сөптөөх үлэ бара турар, кэлэр да өттүгэр итинник үлэ салҕаныаҕа диэн эрэнэбит.
Мунньахха тыа хаһаайыстыбатын үбүлээһин торумнара этилиннэ. Урут тыа хаһаайыстыбатын үбүлээһин министиэристибэттэн ананан кэлэр буоллаҕына, быйылгыттан улуус бэйэтин быһаарыытыгар бэрилиннэ. Ити боппуруоһу быһаарсыыга отчуокка улуус салалтата, тыа хаһаайыстыбатын испэсэлиистэрэ кыттыылаах туспа мунньахтары тэрийиэхпит диэн иһитиннэрдилэр.
Билигин тыа сирэ аҥардас сүөһүттэн ылыллар бородууксуйаттан астанан, үптэнэн олорор. Ол иһин, нэһилиэнньэ тутаах боппуруоһу быһаарыы мунньахтарын сүрдээҕин кэтэһэр, күүтэр, сөптөөх быһаарыы ылыллыа диэн эрэнэр.
Николай Куприянов.