Улуус дьаһалтатын отчуота салҕанар

Тохсунньу 28 күнүгэр улуус дьаһалтатын 2024 сыллааҕы үлэтин отчуоттуур бөлөх Бөтүҥ уонна Өкүндү олохтоохторун кытта көрүстэ.

Күн бастакы аҥарыгар отчуот Бөтүҥ нэһилиэгэр ааста. Кэлбит дьон көхтөөхтүк кытыннылар, элбэх ыйытыы биэрдилэр, баҕа санааларын этиннилэр.

Ол курдук, бастакынан,  улахан суолтан (трассаттан) нэһилиэккэ киирэр суолу өрөмүөннээһин боппуруоһа буолла.  Бу ыйытыыга бырайыакка тахсыбыт суума олус үрдүк буолбутун эттилэр. Ол да буоллар үлэлэһиэхпит, чаастарынан оҥорон саҕалыахпыт диэтилэр. Маны тэҥэ, тыа хаһаайыстыбатыгар, өртөөһүҥҥэ, доруобуйа харыстабылыгар, оҕо уһуйаанын тутуутугар элбэх ыйытыы киирдэ. Нэһилиэк иһинэн үлэлиир аҕалар түмсүүлэрэ оҕолору робототехникаҕа үөрэтиэхтэрин, араас интэриэһинэй дьарыктары көрдөрүөхтэрин баҕаралларын этиннилэр. Бу манна бырайыак оҥорон аҕаллахтарына салалта да, үөрэх управлениета да көмө буолуох буоллулар. Отчуот түмүгэр олохтоохтор улуус дьаһалтатын үлэтин биһирииллэрин, үрдүктүк сыаналыылларын биллэрдилэр.

Өкүндүгэ оскуола аактабай саалатыгар олохтоохтор толору мустубуттар. Олохтоохтор ордук долгутар боппуруостарын биэрдилэр, отчуокка олус көхтөөхтүк кытыннылар, сөптөөх эппиэттэри ыланнар астыннылар.

Ыйытыылар, эмиэ атын нэһилиэктэргэ курдук, сүрүннээн тыа хаһаайыстыбатыгар, доруобуйа харыстабылыгар, үөрэҕириигэ сыһыаннаах буоллулар. Бу нэһилиэккэ саамай сытыытык турар боппуруоһунан саҥа фельдшер үлэлии кэлэрэ буолла. Билигин үлэлии сылдьар фельдшер оҕолонон уурайдаҕына ким көрөр-истэр буолар диэн санаарҕыыллар.  Маны таһынан элбэх ыйытыы нэһилиэнньэ харысхаллаах буолуутун тэрилтэтин үлэһиттэригэр буоллулар. Ханнык түгэҥҥэ кыаммат дьоҥҥо сиделка ананыан сөбүн ыйыттылар. Ону ыарыһаҕы көрөр-истэр дьон суох буоллаҕына диэн хоруй туттулар. Ити курдук тус бэйэҕэ да, нэһилиэккэ уопсайынан да  сыһыаннаах долгутуулаах ыйытыылар бэриллэннэр олус интэриэһинэй кэпсэтии таҕыста. Түмүккэ олохтоохтор баһылык Сергей Винокуровка уонна үлэлии кэлбит бөлөххө махтаннылар, көрсүһүүттэн астыммыттарын биллэрдилэр.

Василина Татаринова.

Читайте дальше