Бүгүн, тохсунньу 28 күнүгэр, күн иккис аҥарыгар улуус баһылыгын бастакы солбуйааччы Иван Евсеев салайааччылаах иккис бөлөх I Тоҕус нэһилиэгин олохтоохторун иннигэр улуус дьаһалтатын 2024 сыллааҕы үлэтин отчуотун туруорда.
Биллэрин курдук, олунньу 16 күнүгэр Тыымпыга баһылык быыбара тэриллиэхтээх. Кэлиҥҥи сылларга баһылыгынан үлэлээбит Акимар Михайлов үлэтин, улуус көмөтүн түмүгүнэн бөһүөлэккэ саҥа тутуулар дьэндэйдилэр, оскуола дьиэтэ федеральнай үбүнэн хапытаалынай өрөмүөнэ ыытылынна. «Лүүчүн» суола өрөспүүбүлүкэ суолталаах буолбутугар кини кылаата эмиэ баар. Итини сэргэ, Тыымпыга тыа хаһаайыстыбатын кэпэрэтиибэ ситиһиилээхтик үлэлиирин эбэн биэрдэххэ, тыымпылар инникилэрин диэки эрэллээхтик көрөллөр.
Отчуоттуур мунньах кэпсэтиитигэр кыттыбыт тыымпылар улуус дьаһалтата ааспыт сылга ыыппыт үлэтин сэргииллэрин биллэрдилэр уонна «Хаарбах дьиэттэн көһөрүү» бырагырааматынан олорор дьиэни тутуу, эргэ эбийиэктэри: балыыһаны, хочуолунайы көтүрүү, тыа хаһаайыстыбатын, оҕо уһуйаанын дьиэтин тутуу, уотунан бигэ хааччыйыы, суол боппуруостарыгар, мелиорацияҕа уо.д.а. болҕомтону туһаайдылар, улуустан көмөнү эрэйдилэр. Тыа хаһаайыстыбатыгар — сүөһү иитиитигэр бэриллиэхтээх субсидия үбүн, КлиКра сокуонун барылын чуолкайдастылар.
Бүлүү улууһун баһылыгын бастакы солбуйааччы Иван Евсеев, Ил Түмэн депутата Егор Григорьев, отчуоттуур бөлөх кыттыылаахтара тыа хаһаайыстыбатын боппуруостарыгар, КлиКра сокуонун барылыгар, атын да ыйытыктарга толору быһаарыылары биэрдилэр.
Ил Түмэн депутата, оройуоннааҕы киин балыыһа кылаабынай бырааһа Егор Григорьев сайын Тыымпыга киһи доруобуйатын туругун быһаарар сүрүн анаалыстары оҥорор тэриллэри аҕалан туруоран үлэлэтиэхтэрин, улууска доруобуйа харыстабылын саҥа эбийиэктэрин үлэҕэ киллэриини сиһилии билиһиннэрдэ.
Николай Куприянов.