Нэһилиэкпит баһылыга Октябрь Иванович Лукин көҕүлээһининэн уонна олохтоох дьаһалта тэрийиитинэн, 2003 сыллаахха нэһилиэк оҕолоругар аналлаах “Баһылык елката” аан бастаан тэриллибитэ. Бастакы елкаҕа туйгун үөрэхтээх, бастыҥ спортсмен, общественник оҕолорго 7 номинацияны, сыаналаах бириистэри туттарбыттара уонна олохтоох дьаһалта үлэһиттэрэ «Буратино” диэн остуоруйаны туоруорбуттара.
Ол сылтан номнуо 22 сыл ааһа оҕуста. Сыл аайы тиһигин быспакка, үгэс быһыытынан, нэһилиэкпит оҕолоругар, ыалдьыттыы кэлбит оҕолорго саҥа дьыллааҕы минньигэс бэлэҕи олохтоох дьаһалта бэлэхтиир.
Ковид ыарыы да кэлбит, уопсай тэрээһиннэр буолбат кэмнэригэр кытта түҥэтиллибитэ. Дэриэбинэбит оҕолоох ыаллара саамай кэрэ көстүүлээх “Моруос оҕонньор” холбуйата диэн кырасыабай гына оҥорон тиэргэн таһыгар ыйаабыттара, ол дьааһык куонкурустаах этэ. Олохтоох дьаһалта хас биирдии ыалы испииһэктээн, ыалдьыт оҕолор ханнык ыалга кэлбиттэрин билэн, ыйытан улахан испииһэк оҥоһуллан босхо минньигэс бэлэҕи Моруос оҕонньор сорох сыл атынан, сорох сыл сатыы кэрийэн, уулуссаларынан түҥэтэрин оҕолор түннүгүнэн көрөн турааччылар. Ити барыта биһиги олохтоох дьаһалтабыт хамаандата уонна “Сайдам” КСК үлэһиттэрэ үчүгэйдик үлэлиирэ көстөр.
Быйылгы “Баһылык елката” бырааһынньыктааҕы тэрээһиҥҥэ, тохсунньу 2 күнүгэр, халлааны тымныы диэбэккэ, элбэх оҕо төрөппүттэрин кытта кэлбиттэр. Кэлбит оҕо барыта Моруос оҕонньортон уонна Хаарчаана кыыстан минньигэс бэлэх ыллылар, представление көрдүлэр, араас көрдөөх аттракционарга оонньоотулар, үҥкүүлээтилэр.
“Ёлка добра” диэн нэһилиэк олохтоохторо спонсордааннар оҕолорго босхо, элбэх сыаналаах бириистээх лотерея оонньонно. Кэлбит оҕолор, төрөппүттэр үөрэн, астынан тарҕастылар.
Лена Мандарова,
общественнай корреспондент.