Бүгүн, ахсынньы 11 күнүгэр, М.Н.Жирков аатынан култуура Дыбарыаһыгар улуустааҕы бэтэрээннэр Сэбиэттэрин уочарата суох отчуоттуур-быыбардыыр мунньаҕа тэрилиннэ.
Мунньахха Бүлүү куоратыттан, улуус бары нэһилиэктэриттэн 100-тэн тахса дэлэгээт кытынна.
Бэтэрээннэр Сэбиэттэрин 5 сыллааҕы үлэтин отчуотун Президиум чилиэнэ, Чернышевскай нэһилиэгин бэтэрээннэрин Сэбиэтин бэрэссэдээтэлэ Раиса Сортоева туруорда. Кини сэрии сылларын оҕолорун тыыл бэтэрээннэригэр тэҥнииргэ этиитин ытыс тыаһынан көрүстүлэр. Мунньах кыттыылаахтара отчуоту биһирээтилэр, «туйгун» сыана биэрдилэр.
Мунньахха тыл эппиттэр бэтэрээннэр Сэбиэттэрин 12 сыл ситиһиилээхтик салайбыт, билигин биһиги кэккэбитигэр суох Герасим Солтуевы үтүө тылынан элбэхтик аҕыннылар. Кини олоҕун, үлэтин биир дойдулааҕа Евгений Алексеев сиһилии билиһиннэрдэ.
Мунньах биир сүрүн боппуруоһунан улуустааҕы бэтэрээннэр Сэбиэттэрин бэрэссэдээтэлин, Президиумун талыы буолла.
Мунньаҕы быстах кэмҥэ Сэбиэт бэрэссэдээтэлин эбээһинэһин толорбут, улуустааҕы быыбар хамыыһыйатын бэрэссэдээтэлэ Тимофей Иванов салайан ыытта. Кини бэрэссэдээтэл дуоһунаһыгар салайар үлэҕэ элбэх уопуттаах, норуот хаһаайыстыбатын үтүөлээх үлэһитэ Федор Николаевы туруорда.
Аһаҕас куоластааһын түмүгэр Федор Николаев улуустааҕы бэтэрээннэр Сэбиэттэрин бэрэссэдээтэлинэн биир санаанан талылынна. Салгыы мунньах кыттыылаахтара Президиум састаабын сүүмэрдээтилэр.
Мунньахха улуус баһылыга Сергей Винокуров, оройуон Сэбиэтин бэрэссэдээтэлэ Гаврил Корякин, өрөспүүбүлүкэтээҕи бэтэрээннэр Сэбиэттэриттэн Николай Егоров, Бүлүү куорат баһылыга Ян Попов, нэһилиэктэр баһылыктара, түмсүүлэр салайааччылара кыттыыны ыллылар.
Мунньах кэмигэр Сергей Винокуров, Гаврил Корякин ытыктабыллаах бэтэрээннэргэ элбэх наҕараадалары туттардылар. Саха Өрөспүүбүлүкэтин Бочуоттаах бэтэрээнэ бэлиэ Наталья Алексееваҕа, Саха Өрөспүүбүлүкэтин бэтэрээннэрин Сэбиэтин Президиумун Бочуоттаах кырааматата Тамара Фоминаҕа, элбэх бэтэрээҥҥэ улуус баһылыгын, оройуон Сэбиэтин Бочуоттаах кырааматалара, Махтал суруктара туттарылыннылар.
Тимофей Иванов «Бүлүү улууһун Бочуоттаах бэтэрээнэ» бэлиэни улуус сайдыытыгар кылааттарын киллэрбит элбэх бэтэрээҥҥэ туттарда.
Николай Куприянов.