Ахсынньы 24 күнүгэр улуустааҕы бэтэрээннэр Сэбиэттэрин президиумун бастакы мунньаҕа буолла. Талыллыбыт 11 чилиэнтэн 10 чилиэн уонна ревизионнай хамыыһыйа 3 чилиэниттэн 2 чилиэн кытыннылар. Мунньахха улуус дьаһалтатын социальнай уонна ыччаты кытта үлэҕэ отделын салайааччыта Елена Николаевна Федорова кыттыыны ылла. Мунньаҕы Президиум бэрэссэдээтэлэ Федор Федорович Николаев салайан ыытта. Барыта 7 боппуруос көрүлүннэ.
Бастакы боппуруос: 2024 сылга нэһилиэктэр икки ардыларыгар түөлбэнэн куоталаһыы түмүгэ бигэргэтилиннэ уонна улуус сыллааҕы үлэтин түмүгүн таһаарарыгар бэрилиннэ.
Иккис боппуруос: президиум чилиэннэрин эбээһинэстэрин анааһын. Бастакы солбуйааччынан Тимофей Николаевич Иванов, солбуйааччынан Пелагея СеменовнаТомская, сэкэритээринэн Раиса Павловна Сортоева буоллулар. Атын чилиэннэр бэйэлэрэ үлэлиир хайысхаларынан сыһыарылыннылар.
Үһүс боппуруос: нэһилиэк бэтэрээннэрин Сэбиэтин куоталаһыыларын түмүгүн таһаарыы болдьоҕун барыллаан 2025 сыл тохсунньу 22 күнүгэр диэри диэн быһаарылынна.
Төрдүс боппуруос: улуустааҕы бэтэрээннэр Сэбиэттэрин 2025 сылга үлэтин былаанын бигэргэтэр уонна Пленум бигэргэтиитигэр киллэрэр туһунан уураах ылылынна.
Бэһис боппуруос: Саха Өрөспүүбүлүкэтин бэтэрээннэрин Сэбиэтин наҕарааадалааһыҥҥа квотата хайдах быһаарылларын балаһыанньатын иһиттибит. Улууска наҕараадалааһын боппуруостарыгар санаа үллэстиитэ буолла.
Алтыс боппуруос: Бүлүү улууһун бэтэрээннэрин Сэбиэтин уочараттаах Пленумун тохсунньу 22 күнүгэр 2025 сылга ыытарга уураах таҕыста.
Сэттис боппуруос: атын араас тэрээһин боппуруостар көрүлүннүлэр.
Ити курдук Президиум саҥа састааба үлэтин саҕалаата.
“Олох суола”.