Кырыа кыһыммыт аам-даам туманын бүрүнэн, ып-ыраас, мап-маҥан кыраһа хаар арыалдьыттаах Сахабыт сиригэр тиийэн кэлиитэ биир туспа кэрэ көстүү буолар. Анысханнаах ахсынньы ыйбыт көрүөх бэтэрээ өттүгэр тиийэн кэлэн, аптаах алыптаах остуоруйа дойдутун санатан, оҕо -аймах биир саамай күүтэр, кэтэһэр бырааһынньыга — саргылаах Саҥа дьылбыт оҕолорго үөрүүнү бэлэхтиир.
Тылгыны нэһилиэгин баһылыга Егор Афанасьевич Иванов сыл аайы хас биирдии оҕоҕо саҥа дьыллааҕы минньигэс бэлэҕи бэлэхтиир. Оҕолор барахсаттар үөрэн чоҕулуспут харахтарын көрөр туохха да тэҥнэммэт үөрүү буоллаҕа. Хас биирдии оҕо Саҥа дьыл чугаһаатаҕын аайы, баһылык бэлэҕин сэмээр иһигэр эрэнэ күүтэрин оҕолор саҥаларыттан истэ- билэ сылдьабыт.
Оотой-тоотой кырачаан оҕолорбутугар, чуопчаарар чыычаахтарбытыгар минньигэс бэлэхтэри бэлэхтээн, оҕолорбутун сырдыкка кынаттыыр, Саҥа дьыл умнуллубат үтүө түгэннэрин бэлэхтиир баһылыкпытыгар махтанабыт.
Аптаах, алыптаах Саҥа дьыл-оҕо-аймах бырааһынньыга буоллаҕа дии? Хас биирдии оҕолоох ыалга, көмүс чыычааҕыҥ күлэр-үөрэр, бэлэх ылан астынар буоллаҕына-эн дьоллоох киһигин.
Өссө төгүл саргылаах Саҥа дьылынан, саҥа дьолунан, үүммүт 2025 сылынан!
Виталина Григорьева