Бүлүү куоратын В.О. Каратаев аатынан Олоҥхо дьиэтигэр.Н.И. Ылахова аатынан «Алгыс» Н К Ц иһинэн үлэлиир В.О. Каратаев аатынан олоҥхоһуттар уонна тойуксуттар народнай коллективтарын тэрийиитинэн аҕам саастаах дьоҥҥо анаан «Күөх харыйа тула» диэн Саҥа дьыллааҕы үгэскэ кубулуйбут көрдөөх-нардаах бэртээхэй тэрээһин ыытылынна.
Дьоро киэһэ саамай муҥутуур чыпчаалынан көрдөөх дьоннор — клоуннар күрэхтэрэ буолла. Быйыл өссө элбэх клоун ох курдук оҥостон, бэлэмнэнэн кыттыбыта улаханнык кэрэхсэннэ.
Ол курдук ханнык баҕарар тэрээһиннэргэ өрүү көхтөөхтүк кыттар үтүөкэн дьоммут: Анастасия Ощепкова, Марина Софронова, Надежда Анисимова, Каролина Харлампьева, Клавдия Софронеева, Мария Васильева, Владимир Николаев клоуннар күрэхтэригэр көхтөөхтүк кыттыбыттарын бэлиэтиир тоҕоостоох.
Итини сэргэ Бүлүү к. коллекционердара өр сылларга харыстаан мунньа сылдьар баай коллекцияларын аҕалан көрдөрүүгэ туруорбуттарын Саҥа дьыллааҕы алыптаах дьоро киэһэ кыттыылаахтара астына-дуоһуйа көрдүлэр.
Өссө биир улахан үөрүүлээх түгэн тосхойдо. Ол курдук Саха Өрөспүүбүлүкэтин култууратын үтүөлээх үлэһитэ Иван Туласынов. Саха Өрөспүүбүлүкэтин култууратын туйгуна Федора Егоровна Донская, Матрена Лукинична Мунхасытова Россия фольклорга Союһун Саха сиринээҕи салаатын «За заслуги в культуре и искусстве» мэтээлинэн, онтон В.О. Каратаев аатынан Олоҥхо народнай коллективын өр сылларга олоҥхону толорооччута, ытыктабыллаах Светлана Павловна Калачикова Ил Түмэн Бочуотунай грамотатынан уонна өйдөбүнньүк чаһыынан наҕараадаламмыттарын СӨ култууратын туйгуна Светлана Тарасовна Иванова үөрүүлээх быһыыга-майгыга туттарда.
Клоуннар күрэхтэригэр кыттыбыт дьоммут бириистэрин үөрэ- көтө туттулар. Бастыҥ клоун аатын Анастасия Николаевна Ощепкова ылла, атын кыттааччылар анал номинацияларынан бэлиэтэннилэр. Онтон бу дьоро киэһэҕэ кэлбит ыалдьыттар көрү-нары көҕүлүттэн туттулар, ыллаан-туойан, оһуокайдаан, былыргы уонна аныгы үҥкүүлэргэ көхтөөхтүк киирэн, сынньалаҥнарын бэһиэлэйдик атааран, үөрэн-көтөн тарҕастылар.
Бу Саҥа дьыл алыптаах дьоро киэһэтин Августина, Матвей Евсеевтэр иилээн- салайан ыыттылар, үөрүүнү-көтүүнү бэлэхтээтилэр.
Муза Федорова.