Кыргыдайга “Күөх уот” дьоро киэһэтэ ыытылынна

Кыргыдайга эргэ Саҥа Дьыллааҕы «Күөх уот»дьоро киэһэтэ   буолан ааста.

Бу киэһэни Бүлүүттэн СӨ култууратын туйгуна, алгысчыт,  тамадаһыт-түсчүт, оһуохайдьыт, олоҥхоһут  Николай Афанасьев — Айдаман  иилээн-саҕалаан ыытта. Өр сыллаах үлэтин үөрүйэҕинэн уол оҕото  этэн-тыынан, туран-олорон, үҥкүүлэтэн-оонньотон, үөрдэн-күллэрэн, көрү-нары көҕүлүттэн туттубут.

Эдэр  ырыаһыттар Люция Жиркова,Айысхаана Васильева, олохтоох «Туску» норуот айымньытын Дьиэтин   музыкальнай салайааччыта Афанасий  Быканов, уус-уран салайааччы Ульяна Жиркова кэрэ куоластарынан ыллаан-туойан, кэлбит ыалдьыттары сэргэхситтилэр. Дуоһуйа сынньанан, астынан, күннээҕи түбүктэн аралдьыйан  тарҕастыбыт. Умнуллубат эмиэ биир үтүө түгэн күлүм гынан ааста.

“Туску” норуот айымньытын Дьиэтин салайааччытыгар Галина Егоровнаҕа уонна бииргэ үлэлиир кэлэктиибигэр барҕа махтал ,үүммүт  Иэйиэхсит сылыгар   айымньылаах үлэҕит киэҥ аартыга арыллан, ситиһиилэри  тосхойдун!

Павлина Кырбасова.

Читайте дальше