Тохсунньу 23 күнүгэр улуус дьаһалтатын 2024 сыллааҕы үлэтин отчуоттуур бастакы бөлөх чугас сытар нэһилиэктэргэ үлэлээтэ.
Күн бастакы аҥарыгар Чинэкэ олохтоохторун кытта көрсүһүү буолла. Кэлбит дьон кэпсэтиигэ көхтөөх кыттыыны ыллылар. Бөлөх салайааччыта, улуус баһылыга Сергей Винокуров отчуотун болҕомтолоохтук иһиттилэр, элбэх ыйытыы биэрдилэр. Ол курдук чинэкэлэргэ оскуола тутуута саамай сытыытык турар эбит. «Саҥа оскуола тутуллар дуо? Тутуллар буоллаҕына хаһан?» диэн ыйыттылар. Манна бөлөх иһинэн үлэлии кэлбит олох-дьаһах, промышленность уонна тутуу отделын начальнига Светлана Прокопьева бырайыактыыр-сметалыыр докумуон оҥоһуллубута эрээри, Бырабыыталыстыба тахсыбыт сыананы наһаа үрдүк буолла диэбитин иһин, бырайыагы уларытан, саҥаттан оҥорторон эрэбит диэтэ. Бу докумуон бэлэм буоллаҕына, үбүлээһин түһүөхтээх уонна үлэ саҕаланыахтаах диэтэ.
Маны таһынан үүт туттарыытын туһунан ыйытыктар киирдилэр. Бу боппуруостарга тыа хаһаайыстыбатын департаменын начальнига Павел Иннокентьев эппиэттээтэ. Ол курдук сүөһү төбөтүгэр бэриллэр харчы отчуоттанар буолбута элбэх дьону хомоппут уонна долгуппут эбит. Онно Павел Павлович бу саҥа ирдэбил улахан бэрэбиэркэ түмүгүнэн баар буолбут диэтэ.
Доруобуйа харыстабылыгар аналлаах эмиэ хас да ыйытык киирдэ. Чуолаан балыыҺа өрөмүөнэ, толору хааччыллыыта буолла. Манна үлэ бара турар диэн хоруйдаатылар.
Кыадаҥдаҕа уонна Чочуга олохтоохтор кыттыылара балачча үрдүк диэххэ сөп. Эмиэ элбэх ыйытыылары биэрдилэр. Сергей Николаевич уонна бөлөх иһинэн үлэлиир туһааннаах исписэлиистэр сөптөөх хоруйдары биэрдилэр. Бу икки сэлиэнньэлэр олохтоохторо үүммүт 2025 сыл биһиги улууспутугар Гавриил Иосифович Чиряев төрөөбүтэ 100 сылыгар аналлаах буолбутун үөрэ иһиттилэр. Сергей Николаевич үбүлүөйдээх сылы хайаан да үрдүк таһымнаахтык көрсүөхпүт, улуу биир дойдулаахпыт аатын Аан дойду үрдүнэн ааттатыахпыт диэтэ.
Олохтоохтортон киирбит ыйытыктар эмиэ тыа хаһаайыстыбатыгар, доруобуйа харыстабылыгар, анал байыаннай дьайыыга сылдьар уолаттарга көмөҕө сыһыаннаах буоллулар.
Бу курдук олус туһалаахтык, интэриэһинэйдик бастакы бөлөххө иккис үлэ күнэ түмүктэннэ.
Василина Татаринова.