Күндү ааҕааччыларбыт, олоххо буолбут түбэлтэлэри кэпсиир, диктини, дьиибэни түмэн сэһэргиир рубрикабытын арыйабыт.
Чараас эйгэ. Былыр-былыргыттан дьон-сэргэ улаханнык саҥарбакка, сэрэнэн соҕус олоххо буолбут кутталлаах кэпсээннэри, дьулаан түбэлтэлэри кэпсэтэллэрин сөбүлүүллэр. Ол кэпсээннэр сорохторо эбиллэн, сиэллэнэн-кутуруктанан уостан уоска бэриллэр үһүйээннэргэ кубулуйаллар. Билигин биһиги да олохпутугар ылбычча киһи быһаарбат түбэлтэлэрэ аҕыйаҕа суохтар. Бу бүгүн кэпсиир түбэлтэбин улууспут биир кырдьаҕас оскуолатын учуутала кэпсээбитэ.
Кураанах оскуолаҕа атах тыаһа
— Оскуолаҕа тыас-уус куруук баар диэн элбэхтэ истибитим эрээри, бэйэм түбэспэтэх буоламмын, улаханнык аахайааччы суохпун. Арай бу саас үөрэх дьыла түмүктэнээри оҕо аҕыйах. Экзамен туттарыахтаах аҕыйах кылаас консультацияҕа кэлэллэр. Ол күн оскуолаҕа бэйэбит эрэ этибит. Оҕолорбор сорудах биэрэммин, бары суругунан үлэлии олороллор. Уу-чуумпу. Тэтэрээккэ суруйар эрэ тыастара иһиллэр. Арай көрүдүөргэ кыра оҕо атаҕын тыаһа иһилиннэ. Бачыыҥкалаах курдук, төттөрү-таары сүүрэр. «Оҕо суох буолуохтаах этэ, ким кэллэҕэй» диэммин ааны арыйбакка быыһынан көрбүтүм, көстүбэт оҕо атаҕын тыаһа тохтоон хаалла, онтон эмискэ миэхэ утары сүүрэн кэлбэтэ дуо! Соһуйбутум бэрдиттэн кэннибинэн чинэрийдим. Оҕолору куттаамаары эппэтэҕим да, оҕолор сэрэйбиттэр этэ.
Спортивнай саалаҕа
Өссө биир түбэлтэни эмиэ бииргэ үлэлиир кыыһым кэпсээбитэ. Спортивнай саалабыт улахан, манна киэһэ мээчик тыаһыыр, оҕолор хаһыытаһаллар үһү диэн сир-буор аннынан кэпсээннэри куруук истээччибит. Ол эрээри илэ көрбүт киһи суоҕа. Биирдэ солбукка киирэммин сааланы сууйар буоллум. Секциялар бүппүттэрин кэнниттэн киэһэ сууйуохтаахпын. Хас да күн туох да биллибэккэ үлэлээтим. Арай биирдэ 3 саастаах кыыспын хаалларар сирим суох буолан илдьэ барарга күһэлинним. Саалабыт улахан, уоттара аҥардаан тыгаллар, биир өттүн сууйарбар анараа өттө хараҥа буолар. Кыыспар: «Эн ол диэки баран мээчигинэн оонньоо, сүүрэкэлээ, маамаҕа мэһэйдээмэ»,- диэн ыыттым. Кыыһым начаас төттөрү сүүрэн кэллэ. «Маамаа, итиннэ хараҥаҕа дьоннор тураллар»,- диэтэ уонна саала улаҕатын диэки ыйар. «Ким да суох дии»,- дии сатаатым да «Ол тураллар»,- дии-дии ыйар. Һуу! Куттанан уҥуоҕум халыр-босхо бардар да, оҕобун куттаныа диэммин түргэн-түргэнник таҥнан, таһырдьа таҕыстыбыт. Ол кэннэ уурайбытым.
Галина Долгунова.