Дойдубут туһугар биир санаанан

Украинаҕа  байыаннай дьайыы саҕаламмыта иккис сыла буолла, Бүлүү улууһуттан элбэх биир дойдулаахтарбыт суһаллык ыҥырыллан барбыттара. Бастакы барааччылар бэбиэскэ тутаат да байанкамааттан үлдьүргү туралларын курдук  айанныыллар этэ. Быстах хомуур саҕаланыаҕыттан  биир дойдулаахтарбытыгар  көмөлөһөр сыалтан 2022 сыл балаҕан ыйын 29 күнүгэр  Бүлүү куоратын Чапаев уулуссатын  20 «б» нүөмэригэр турар В.О.Каратаев аатынан Олоҥхо  дьиэтигэр улуустааҕы көмө оҥорор анал  пуун тэриллибитэ. “Үрүҥ көмүс” волонтердар 4 буолан  үлэбитин саҕалаабыппыт “Алаһа” түмсүү салайааччыта Екатерина Герасимовна Алексеева,  “Стимул” түмсүү чилиэнэ Валентина Михайловна Кононова, Бүлүү улууһун уопсастыбаннай түмсүүлэрин салайааччытын солбуйааччы Елена Яковлевна Сивцева, пуун салайааччытынан мин — Мария Петровна Томская.

Алтынньы, сэтинньи, ахсынньы ыйдарга түүннэри-күнүстэри өрөбүлэ суох үлэлиир этибит, сорох күннэргэ бэбиэскэ туппут уолаттарбыт сарсыарда уонна киэһэ айанныыллара, уолаттарбытыгар куорат олохтоохторо, тэрилтэлэр, улуус түмсүүлэрэ аҕалбыт утары туттуллар малларын, астарын, ичигэс таҥастарын 180 л. улахан үрүксээккэ толору уган биэртэлээн, “Үрүҥ көмүс” волонтер Екатерина Герасимовна Алексеева  астаабыт алаадьытынан алгысчыттар  Владимир Николаев-Тоорукча, Ньургуйаана Саввинова алгыстаан, сахалыы сиэринэн, аара баран иһэн бэлиэ сирдэргитин аһатан ааһаарыҥ диэн  алаадьы биэрэн ыыталыыбыт.

Анал байыаннай дьайыыттан уоппускаҕа кэлэ сылдьар уолаттарбыт уопсастыбаннай түмсүүлэр ийэлэрэ илиилэрин сылааһынан тикпит таҥастарын кэтэн көрөн, бэйэлэригэр наадалаах  малларын талан, вещмешокпутугар толору уктан үөрэн бөҕө буолаллар уонна маннык пуун баара наһаа үчүгэй, бастаан ыҥырыллан барарбытыгар,  байанкамаакка кэлэн, эмиэ сээкэй бөҕөтүн биэрэн ыыппыккыт диэн махтанан бараллар. Бу күннэргэ элбэх уол кэлэн барда, таҥастан, малтан ураты өссө иккилии, үстүү маскировочнай сеткалары ылаттаатылар.

Анал байыаннай дьайыыга сылдьар дьоннорбут дьиэ кэргэттэригэр араас хабааннаах көмөлөр оҥоһуллаллар. Ол курдук  кулун тутар 14 күнүгэр Бүлүү улууһун мелиорациятын инженер механига Николай Николаевич Федоров мелиорация үлэһиттэрин уонна табаарыстарын хамаандатын кытары муҥхалаан, сип-сибиэһэй балыгынан күндүлээтилэр. Ону  90 пакекка уган бэлэмнээбиппитин сарсыарда куорат дьаһалтатын үлэһиттэрэ анал байыаннай дьайыыга сылдьар дьоннордоох ыалларга дьиэлэригэр илдьэн биэртэлээтилэр.

Олунньу ыйга өрөспүүбүлүкэтээҕи акцияҕа кыттыһан,  анал байыаннай дьайыыга сылдьар уолаттарбытыгар армия күнүнэн эҕэрдэлээн, бэйэбит тикпит таҥастарбытын, маскировочнай сеткалары, минньигэс астары уонна да араас утары туттуллар маллары баһыылка бэлэмнээн Дьокуускайга көмө оҥорор анал пууҥҥа ыыппыппыт. Ол кэнниттэн “Блиндажные свечи” акцияҕа кыттыһан, түмсүүлэр оҥорбут чүмэчилэрин улуус баһылыгын социальнай политикаҕа солбуйааччы Александр Прокопьев Дьокуускайга илдьэн туттарбыта.

Кулун тутар 21 күнүгэр Бүлүүттэн икки киһилээх делегация айаннаата, улуус баһылыгын солбуйааччы Александр Прокопьев уонна Баппаҕаайы нэһилиэгин баһылыга Егор Николаев бардылар. Көмө оҥорор пуунтан уопсастыбаннай түмсүүлэр “Күбэйэ” (Тааһаҕар), “Сүрэҕим баҕатынан” (Баппаҕаайы), “Дайыы” (Кыргыдай), Арыылаах нэһилиэгин олохтоохторо, түмсүүлэрэ оҥорбут 35 маскировочнай сеткаларын, 17 нашлемнигы (маны барытын Виталий Мандаров уот сиэбэт растворунан ыстарбыта).

Баппаҕаайы нэһилиэгиттэн “Сүрэҕим баҕатынан” түмсүү оҥорбут 2000  армейскай сухой душтарын (8 куул), 500 бойобуой испиискэлэрин, Хаҕынтан “Аҕам саас” түмсүү сиэлтэн оҥорбут 49 угунньуларын, Чинэкэттэн Марк Викторович Михайлов тикпит аптечкаларыгар “ФАРМ+”  аптека салайааччыта Саргылана Федоровна Егорова спонсордаабыт эмтэрин-томторун толору уган, наскылары, ис таҥастары, Дьөккөн нэһилиэгиттэн оҕо уһуйаанын, оскуола коллектива ыыппыт 5 лиитирэлээх пластиковай уу бытыылкатыгар араас астаах, утары туттуллар маллардаах 30 нобуорун уонна “Оһуор” түмсүү чилиэнэ Елена Протопопова пластиковай картаҕа биир өттүгэр бэйэтэ суруйбут алгыс тылларын, иккис өттүгэр Бүлүү айылҕатын, сиэдэрэй сибэккилэрин түһэрэн оҥорторон биэрбитин ыыттыбыт.

Байыаннай, флисовай, плащевай көстүүмнэри, толстовкалары, сэлиэнчиктэри, камуфляжнай, плащевай ыстааннары, плащевай пончалары, араас олбохтору, балаклавалары, кэтиинчэлэри, аптечкалары, сиэлтэн угунньулары, харысхаллары, вещмешоктары анал байыаннай дьайыы саҕаланыаҕыттан уопсастыбаннай түмсүүлэр амарах санаалаах ийэлэрэ илиилэрин сылааһынан анаан-минээн бэйэлэрэ тигэллэр. Былырыыҥҥаттан маскировочнай сеткалары, блиндажнай чүмэчилэри оҥороллор, быйыл уһуннук умайар испиискэлэри, наһаа наадалаах армейскай сухой душтары оҥорор буоллулар, ону таһынан түмсүүлэр харчы кыттыһаммыт иистэнэр матырыйаалларбытын, утары туттуллар маллары, ис таҥастары иннэтигэр-сабыгар тиийэ атыылаһабыт.

Бу күннэргэ Баппаҕаайы нэһилиэгин баһылыга Егор Афанасьевич Николаев кэпсэтэн маскировочнай сиэккэ уонна сиэккэҕэ тиһиллэр матырыйаалын сакаастаабытын, улуус дьаһалтатын иһинэн быстах хомуурга барбыт дьоннорбутугар анаан тэриллибит  фондатыттан харчытын төлөөннөр барыта кэллэ, билигин уолаттарбыт сакаастыылларын курдук 6х4 миэтэрэлээх маскировочнай сиэккэлэри оҥоруу саҕаланыаҕа. Сиэккэ оҥоруутугар маастар-кылаастары балаҕаҥҥа оҥорон көрдөрүөхтэрэ. Ким көмөлөһүөн баҕалаахтары кэлэн көмөлөһөргүтүгэр ыҥырабыт.

Ити курдук биһиги атын сирдэр волонтердарын, көмө оҥорор пууннарын курдук, тиһигин быспакка улуус көмө оҥорор  штабын, Бүлүү улууһун уопсастыбаннай түмсүүлэрин кытары сүбэлэһэн, туох кыахтаахпытынан кыайыыны чугаһатар сыаллаах, биир дойдулаахтарбыт, этэҥҥэ, түргэнник дьиэлэригэр эргиллэн кэлэллэрин туһугар көмө оҥорон, сомоҕолоһон үлэлии-хамсыы сылдьабыт.

Күүс-көмө буолар дьоннорбутугар, Баппаҕаайы нэһилиэгин баһылыгар Егор Афанасьевич Николаевка, Виталий Витальевич Мандаровка, Николай Николаевич Федоровка, мелиорация үлэһиттэригэр уонна кини хамаандатыгар,  Арыылаах, Тааһаҕар, Баппаҕаайы нэһилиэктэрин олохтоохторугар, Марк Викторович Михайловка, улахан төһүү көмөнү оҥорор улуус түмсүүлэригэр уонна көмө оҥорор пуун саамай күүстээх үлэһитигэр Екатерина Герасимовна Алексееваҕа, эһиги сыралаах үлэҕитин үрдүктүк сыаналаан туран, барҕа махталбын биллэрэбин!  Баҕарабын эһиэхэ саха аламааһыныы кытаанах доруобуйаны, дьоллоох эйэлээх олоҕу! Хаһан да сахалыы сайаҕас, аһыныгас санааҕыт самныбатын диэн алҕаатаҕым буоллун.

2022 сыл балаҕан ыйын 29 күнүгэр Олоҥхо дьиэтигэр тэриллибит, байыаннай дьайыыга сылдьар дьоннорбутугар көмө оҥорор пуун, Олоҥхо дьиэтигэр “Алгыс сынньалаҥ киинэ көһөн кэлэн үлэлии олорорунан, көстө.

 БИЛИГИН АНАЛ БАЙЫАННАЙ ДЬАЙЫЫГА СЫЛДЬАР ДЬОННОРБУТУГАР, КИНИЛЭР ДЬИЭ КЭРГЭТТЭРИГЭР  “КӨМӨ ОҤОРОР ПУУН”,   ОЛОҤХО ДЬИЭТИН  АТТЫГАР ТУРАР  “УУС КЫҺАТА”  БАЛАҔАҤҤА ҮЛЭЛИИР.

Мария Томская,

Бүлүү куоратын бочуоттаах олохтооҕо,

Бүлүү улууһун уопсастыбаннай түмсүүлэрин салайааччыта.

 

 

Читайте дальше