Бүлүү улууһуттан анал байыаннай дьайыыга сылдьар биир дойдулаахтарбытыгар уонна кинилэр дьиэ кэргэттэригэр көмөлөһөр сыаллаах улуустааҕы көмө оҥорор пуун мобилизация саҕаланаатын 2022 сыл балаҕан ыйын 29 күнүгэр тэриллэн, Екатерина Герасимовна Алексеева, Елена Яковлевна Сивцева, Валентина Михайловна Кононова, пуун салайааччытынан Мария Петровна Томская буолан, бастаан Олоҥхо дьиэтигэр, билигин Олоҥхо тиэргэнигэр баар балаҕаҥҥа сарсыарда 10 чаастан эбиэккэ тохтобула суох, киэһэ 6 чааска диэри, сороҕор түүннэри, үтүө санаанан салайтаран, биир да күн тохтообокко үлэлии сылдьабыт.
Билигин көмө оҥорор пууҥҥа сүрүн үлэһиттэр 8-пыт, ону таһынан улуус уопсастыбаннай түмсүүлэрэ, үрүҥ көмүс волонтердар, тэрилтэлэр, олохтоохтор, урбаанньыттар күүс-көмө буолаллар.
Мобилизация саҕаламмытыгар суһаллык улуус дьаһалтатын кытары акция оҥорбуппут, нэһилиэктэр уопсастыбанньыктара, олохтоохторо, тэрилтэлэр, урбаанньыттар, биирдиилээн дьоннор ичигэс таҥаһы, утары туттуллар малы-салы аҕалбыттара, улуус уопсастыбанньыктара бары кыттыһан харчы хомуйан, улахан истээх рюкзактары атыылаһан, таҥастары, утары туттуллар малы-салы онно уган биэртэлээн, уолаттарбытын байыҥкымаакка тиийэн, сорох күн иккитэ атаартыыр этибит.
Икки сыл тухары нэһилиэктэр уопсастыбаннай түмсүүлэрин, олохтоохторун кытары бары бииргэ сүбэлэһэн үлэлии сылдьабыт. Маҕаһыыҥҥа байыаннай көстүүмнэр, тигиллибит таҥастар сыаналара наһаа ыараханын иһин түмсүүлэр бэйэбит матырыйаал ылан тигиэххэйиҥ диэн салайааччыбыт Мария Петровна этии киллэрэн, күн бүгүнүгэр диэри иистэнэ сылдьабыт. Дьокуускайтан тигэр матырыйаалларбытын атыылаһан кэллибит да түмсүүлэр көмө оҥорор пуунтан киирэн тигэр матырыйаалларын, фурнитураларын ылан тахсаллар, бары үллэстэн байыаннай, флисовай, ардахтан харыстанар көстүүмнэри, флисовай толстовкалары, пончалары, чараас, халыҥ балаклавалары, бэргэһэлэри, сытарга аналлаах ковриктары, универсальнай үс гына арыллар курга кэтиллэр олбохтору, кэтинчэлэри, аптечкалары, үтүлүктэри, вещмешоктары, таба тыһын собуонньугуттан олбохтору, Илизаров аппарааттаах уолаттарга бэйэлэрин сакаастарынан атахтарыгар сөп гына этэрбэстэри тигэбит, араас харысхаллары, сиэлтэн угунньалары, кыра дэйбиирдэри, блендажнай чүмэчилэри, армейскай сухой душтары оҥоробут. Госпитальга сытар байыастарга анаан таҥастары, косточкалары, бубликтары, сыттыктары, валиктары тигэн оҥоробут, харыстанар сиэккэлэри өрөбүт. Уоппускаҕа кэлэ сылдьар, контрагынан барар уолаттарбыт пуунтан кэлэн бэйэлэрэ кэтэн көрөн таҥнан, 26 араас малы-салы, харыстанар сиэккэлэри ылан бараллар. Ону таһынан биирдиилээн уолга анал аадырыстаммыт баһыылкалары ыыталыыбыт.
Ол иһин тигэрбитигэр флисовай, камуфляжнай, плащевай, оксфорд, палаточнай матырыйаалларга, профессиональнай иистэнэр, оберлоктуур массыыналарга, таҥас быһарга электрическай массыыҥкаҕа наадыйабыт.
Тымныйбытынан сибээстээн ичигэс таҥас: сибиитирэ, термобелье, халыҥ наскы, истээх сон, ыстаан, куурка, флисовай көстүүм, үтүлүк, бэргэһэ, халыҥ атах таҥаһа, халыҥ саппыкы (анаратах хаамар сирдэрэ барыта мас буолан кытай доширак саппыкыта алдьанан хаалар эбит), ол иһин уолаттар халыҥы сакаастыыллар. Улуус олохтоохторун, урбаанньыттары, тэрилтэлэри күүс-көмө буоларгытыгар ыҥырабыт!
Бу күннэргэ харыстанар сиэккэ өрүүтүгэр улуус үрдүнэн акция саҕаланна.
Убаастабыллаах Бүлүүбүт улууһун, куоратын олохтоохторун, тэрилтэлэр коллективтарын, общественнай түмсүүлэри, урбаанньыттары анал байыаннай дьайыыга сылдьар биир дойдулаахтарбытыгар дронтан, өстөөх хараҕыттан харыстанар сиэккэ өрүүтүгэр кэлэн күүс-көмө буоларгытыгар ыҥырабыт.
Биһиги өрөн бэлэмнээбит сиэккэлэрбит уолаттарбыт дронтан көмүскэнэллэригэр уонна техникаларын саһыаралларыгар олус наадалаах . Бүгүн хас биирдии киһи уолаттарбытыгар өйөбүл-тирэх буолуон наада. Биһиги илиибит сылааһынан өрбүт сиэккэлэрбит кинилэр олохторун харыстыылларын өйдөөн-санаан туран, бука бары харыстыыр сиэккэлэри өрүүгэ биллэриллибит акцияҕа көхтөөхтүк кэлэн кыттаргытыгар эрэнэбит.
Матырыйаал кырыйарга кыптыйдаах кэлэргитин санатабыт.
Аадырыспыт: Бүлүү куората, Чапаев уулуссатын 20 б, Олоҥхо дьиэтин тиэргэнигэр турар балаҕаҥҥа үлэлиир анал байыаннай дьайыыга сылдьар уолаттарбытыгар уонна кинилэр дьиэ кэргэттэригэр улуустааҕы көмө оҥорор пуун.
Улуустааҕы көмө оҥорор пуун.